کابل ټکی کام (شنبه، ۹ کب، ۱۴۰۴ل)
د ازبکستان د بهرنیو چارو وزارت د افغانستان او پاکستاني رژيم ترمنځ د وروستیو نښتو په اړه اندېښنه ښودلې او د کابل او اسلاماباد ترمنځ یې د سملاسي اوربند غوښتنه کړې ده. دغه وزارت په یوه خبرپاڼه کې ویلي چې دواړه لوري باید خپلې شخړې د سولهییزو لارو، سیاسي خبرو او ډیپلوماټیک تعامل له لارې حل کړي، زغم او حوصله غوره کړي او له هغو اقداماتو ډډه وکړي چې کړکېچ زیاتوي.
په اعلامیه کې د هېوادونو ترمنځ د ملي حاکمیت، ځمکنۍ بشپړتیا او متقابل درناوي پر اصولو هم ټینګار شوی دی.
همداراز، د عراق بهرنیو چارو وزارت هم د تاوتریخوالي پر زیاتېدو اندېښنه ښودلې او پر دواړو لورو یې غږ کړی چې له زغم او احتیاطه کار واخلي او شته اختلافات د ډیپلوماټیکو لارو حل کړي.
په همدې حال کې اروپايي ټولنې هم د افغانستان او پاکستان ترمنځ پر روان کړکېچ اندېښنه څرګنده کړې او د تاوتریخوالي د سملاسي کمولو غوښتنه یې کړې ده.
اروپايي ټولنې له ښکېلو اړخونو غوښتي چې خبرې اترې پیل کړي څو د ملکي وګړو او حیاتي زیربناوو خوندیتوب تضمین شي، او ټینګار یې کړی چې د جګړې پر ځای سیاسي حل لاره غوره شي.
