ډونالډ ټرمپ: يو شمېر هېوادونه به د هرمز تنګي د خوندي ساتلو لپاره جنګي بېړۍ واستوي
کابل ټکی کام (شنبه، ۲۳ کب، ۱۴۰۴ل)
د امریکا ولسمشر ډونالډ ټرمپ ویلي چې د هرمز تنګي د خلاص او خوندي ساتلو لپاره به یو شمېر هېوادونه د امریکا په همغږۍ جنګي بېړۍ سیمې ته ولېږي.
نوموړي په تروث سوشال کې لیکلي چې هغه هېوادونه چې د ایران له خوا د هرمز تنګي د تړلو له هڅې اغېزمن شوي، غواړي په ګډه د دې مهم سمندري مسیر امنیت تأمین کړي.
ټرمپ ادعا کړې چې امریکا د ایران پوځي وړتیاوې په بشپړه توګه له منځه وړي، خو ویلي یې دي چې ایران بیا هم کولی شي د بېپیلوټه الوتکو، ماینونو یا لنډ واټن توغندیو له لارې په دې سمندري لاره کې ګواښ رامنځته کړي.
هغه همداراز پر چین، فرانسه، جاپان، سویل کوریا او بریتانیا غږ کړی چې د هرمز تنګي د امنیت لپاره خپلې بېړۍ سیمې ته واستوي.
نوموړي زیاته کړې چې امریکا به په همدې حال کې د ایران پر ساحلي سیمو خپل بریدونه دوامدار وساتي او د ایران کښتۍ او پوځي بېړۍ به له منځه یوسي.
ټرمپ ټینګار کړی چې هرمز تنګي به ډېر ژر په هر ډول ممکنه لاره خلاص، خوندي او ازاد وساتل شي.
