د پاکستان پوځي رژيم له لوري پر کونړ د ډيسي توپونو بریدونو کې ملکيانو ته درانه مالي زيانونه اوښتي
کابل ټکی کام (شنبه، ۸ وری، ۱۴۰۴ل)
د کونړ امنيتي مسوولين وايي، چې د پاکستاني پوځي رژيم له لوري د ډېسي توپ مرمۍ د دغه ولايت د منورې ولسوالۍ په برولو سيمه او د اسعداباد ښار په کڅۍ او ماڼو سيمو کې د ملکي خلکو پر کورونو لګېدلي، چې له امله يې خلکو ته درانه مالي زيانونه اوښتي دي.
معلومات ښيي چې د ډېورند فرضي کرښې ته څېرمه زرګونه کورنیو خپلې اصلي مېنې پرېښي او خوندي سیمو ته کډه شوي دي.
ځايي اوسېدونکي وايي ، د جمعې د غرمې څخه تر شپې ناوخته پورې پاکستاني پوځ د اسعداباد ښار پر ګڼو سيمو توغندیز بریدونه کړي، چې له امله يې لږ تر لږه درې کسان ټپیان شوي او خلکو خپل کورونه خالي کړي دي.
