لیکوال: همت وردګ
د پرځېدلي جمهوریت ځینې ازمویل شوي واکداران، چې د بېکارۍ له امله یې فرهنګي نمایشي جبهې جوړې کړې، تر څو پر خپلو کاذبو دعوو او څرګندونو ځان ته د خټې پوزې جوړې کړي؛ دوی اکثره وخت په سوشل مېډیا او ټولنیزو رسنیو کې حاکم نظام د پاکستان نیابتي ډله بولي.
د حیرانتیا ځای دا دی چې دوی په ډېرې سپین سترګۍ او بې شرمۍ سره لګیا دي. دوی ځانونه د بهرنیو سازمانونو نیابتي ډلې نه بولي. دوی چې شل کاله د ناټو پر اوږو سپاره وو، د هغه پر پیسو، هدایت او ملاتړ یې د یوه فاسد نظام خونړۍ ژرنده د ملت په وینو چلوله، هغه د خپل سیکولر علم پر اساس مشروع بولي.
دوی چې د ډېورنډ فرضي کرښه لسګونه ځایه پاکستاني لوري ته ورخرڅه، معامله او لا غوښنه کړه، هغه خیانت نه بولي او ځان بیا هم له پاکستان سره د دښمنۍ په لومو کې بند بولي؛ حال دا چې د دوی دا ملي خیانتونه بشپړ مستند، روښانه او ملت پرې آګاه دی.
دا یقیني ده چې د پرځېدلي جمهوریت ازمویل شوي واکداران د سپین سترګۍ او بې شرمۍ په وروستي حد کې دي.
دوی چې د خپل واک پر مهال به یې د هېواد د مظلومو او معصومو زامنو پر سرونو لوبې کولې، دوی ته یې د ژوند حق نه ورکاوه، د دوی پر کورونو یې د شپې او ورځې په پوره وحشت چاپې وهلې، چې د ښځو، ماشومانو او سپین ږیرو په شمول به یې له یوې مخې له ژوند کولو د ابد لپاره محرومول؛ دوی د هغه وخت دا هر څه تر یوه غربي اساسي قانون لاندې د خپلواکۍ لپاره بولي او د هغه نظام لاسپوڅې رهبري او لارښوونکي د امریکا نیابتي ډله نه بولي؛ خو اوسنی نظام، چې د ولس له منځه راټوکېدلی، ملت پر خپله سینه په پوره محبت په غېږ کې نیولی، پر هېواد تخطي کوونکو، اشغالګرو او تیري کوونکي ته یې په پوره مېړانه او ځاني قربانۍ جواب ویلی؛ دوی یې بیا هم د همدې پاکستان نیابتي ډله بولي.
دا چې په افغانستان کې پخواني ازمویل شوي او د پردو لاسپوڅي، د وخت د واک پر مهال له بشپړ قوت سره مل نسکور، شرمنده او تېښتې ته اړ شول، دوی اوس یو ځل بیا په افغانستان کې د ناامنۍ او شخصي عقدو پاللو لپاره پاکستان ته د غلامۍ سر ټیټ کړی. لکه څنګه چې امریکا پاکستان ته د افغانستان خلاف هر ډول سیاسي پروژې ورکوي، دې ته ورته پاکستان د افغانستان پخوانیو تښتېدلو واکدارانو ته د ځینو فعالیتونو پروژې ورکوي او په همدې زمینه سازۍ له وخته لګیا دي، ترڅو په افغانستان کې یو ځل بیا د ناامنۍ تورې ورېځې راولي او د افغانستان معصوم ولس یو ځل بیا د پنجابي او امریکایي طرحه شوي پلان پر اساس د دوی په ذریعه تر پښو لاندې او له ژوند محروم کړي. خو د ځوان وزیر خبره: “این خیال است، ومحال است، وجنون!”
د افغانستان یاده نیابتي ډله(د پرځېدلي جمهوریت چارواکي) دا هر څه په افغانستان کې د مؤقتي واک، نمایشي رتبو، شخصي مېلو، چړچو او مفاداتو لپاره کوي؛ خو په یوه ستره بې شرمۍ او سپین سترګۍ سره پر افغانستان اوسنی حاکم مسلمان نظام او حاکمان د پاکستان نیابتي ډله بولي.
