کابل ټکی کام (چهارشنبه، ۱۹ وری، ۱۴۰۵ل)
د ایران حکومت له امریکا سره وروستی لنډمهالی اوربند د هېواد لپاره یوه ستره بریا بللې ده.
د راپورونو له مخې، د ایران د ملي امنیت عالي شورا په یوه خپره کړې اعلامیه کې ویلي، چې ایران په دې جګړه کې نږدې خپلې ټولې ټاکل شوې موخې ترلاسه کړې دي.
په اعلامیه کې زیاته شوې، چې د ایران د پوځي او سیاسي دریځونو له امله دښمن له “تاریخي ناکامۍ” سره مخ شوی او ونه توانېد، چې خپلې موخې عملي کړي.
ایراني چارواکي ټینګار کوي، چې دا اوربند د دوی د مقاومت او فشارونو پایله ده او دا به د سیمې پر راتلونکي وضعیت مهم اغېز ولري.
