کابل ټکی کام (چهارشنبه، ۱۹ وری، ۱۴۰۵ل)
د لبنان چارواکي وایي، چې د صهیونیستي اشغالګرو لهخوا د پلازمېنې بیروت پر بېلابېلو سیمو پراخ هوایي بریدونه ترسره شوي، چې له امله یې تر دې دمه شاوخوا ۵۰۰ تنه شهیدان او سلګونه نور ټپیان شوي دي.
د راپورونو له مخې، یوازې له نن سهار راهیسې پر بیروت ښار شاوخوا ۱۱۰ هوایي بریدونه شوي دي، چې ډېری یې پر ملکي سیمو متمرکز وو.
لبناني چارواکو ټینګار کړی، چې د بریدونو ټول قربانیان ملکي وګړي دي.
چارواکي زیاتوي، چې په دغو بریدونو کې عامه تأسیسات، روغتونونه او ښوونځي په نښه شوي، چې له امله یې ستر بشري ناورین رامنځته شوی دی، د ژغورنې ډلې لا هم د ویجاړیو لاندې د مړو را ایستلو پسې ګرځي، چې ښایي د شهیدانو شمېر لوړ شي.
