کابل ټکی کام ۲۵حمل/۱۳۹۵، احمدالله مهاجر
له کندز ولایت څخه خبري منابع وايي، چې افغان امنیتي سرتېرو د دغه ولایت پر نشو د روږدو کسانو د درملنې یو روغتون تړلی، او د نظامي قرارګاه په توګه ترې کار اخلي.
د نشه یي توکو پر ضد مبارزې وزارت مسئولینو د رسنیو له لارې د عامې روغتیا د وزارت پر چارواکو کلکه نیوکه کړې ده، چې په دوو کلونو کې د خپل روغتون پر فعالېدو ونه توانېدل.
د کندز د نشه یي توکو پر ضد د مبارزې رئیس عبدالبصیر مرشد رسنیو ته وویل، دغه روغتون چې دوه کاله وړاندې یې د تأسیس ډبره اېښودل شوې، پر نشو روږدو کسانو د درملنې لپاره شل بستریز روغتون جوړ کړی دی.
دغه روغتون د نشه یي توکو پر ضد مبارزې وزارت د هڅو په پایله کې مینځ ته راغلی دی.
نوموړي په دغه ولسوالۍ کې د دغه روغتون د جوړېدلو وجه دا ښودلې چې د ولایت د ټولو ۳۰زره روږدو کسانو څخه ۱۷ زره کسان په دغه ولسوالۍ کې دي.
د کندز د ولایتي شورا یوه غړي عبدالحکیم سادات هم په دغه روغتون کې د افغان ځواکونو قرارګا تأیید کړې ده، او ویلي یې دي، چې اوس هم ترې د فوځي قرارګاه په توګه کارول کیږي.
سادات همدا راز وویل، چې په دغه ولسوالۍ کې پر نشو د روږدو کسانو شمېره ورځ تر بلې په لوړېدو ده، د ده له قوله چې حکومت د دغو روږدو کسانو د درملنې په اړه هېڅ ډول فکر نه کوي، او نه هم ورته لېواله دی.
د دغه روغتون ودانۍ د امریکا سفارت نشیه یي توکو سره د مبارزې او قانون تطبیق نړیوالې ادارې په مالي لګښت جوړه شوې ده، چې شل بستره لري، او ۱۴ میلیونه ډالره لګښت پرې راغلی دی.
د یادولو ده، چې د روانې حمل میاشتې په ۷مه نېټه د لوګر د یوه ښوونځي ښوونکو د رسنیو له لارې څرګنده کړه، چې له تېر کال راهیسې د دغه ولایت د بره کي برک ولسوالۍ د چلتن سیمې په منځني ښوونځي کې د ملي اردو ځواکونو یوه پوځي قرارګاه پرانیستې، او لاهم پکې مېشت دي.
همدا راز د روانې میاشتې حمل په ۲۳مه نېټه هم په بغلان کې د ښوونځیو مدیرانو ویلي وو، چې د ډنډغوري، ډنډشهاب الدین او د پلخمري ولسوالۍ په ځینو نورو سیمو کې افغان ځواکونو ۱۵ ښوونځي د زدکوونکو پر مخ تړلي دي.
