کابل ټکی کام ۲۵حمل/۱۳۹۵، احمدالله مهاجر
پرون د طالبانو رهبري شوری د عمري پسرلنیو عملیاتو اعلان وکړ، چې ورسره سم د هېوا په ټولو برخو کې د دوی وسله والو خورا تندریز او توند عملیات پیل کړل.
دا چې طالبانو د دغو عملیاتو لپاره ځانګړي ځواکونه روزلي دي، او په درندو وسلو سمبال دي، د دولت لپاره خورا ګواښوونکي ښکاري.
دا مهال د طالبانو له لورې یو شمېر انځورونه خپاره شوي دي، چې دوی ورته «استشهادي مجاهدین» وایي.
دغه «استشهادي مجاهدین» د عمري عملیاتو لپاره روزل شوي دي، چې د افغان حکومت پر مهمو ځایونو به سرتېري بریدونه ترسره کوي.
طالبان وایي:
« د استشهادي کنډکونو دغه نوي فارغ شوي فدايان چې د جګړې په ډګر کې د دښمن له منځه وړلو ځانګړي تکتيکونه ورزده شوي، کولی شي د دښمن تر ټولو زيات کلک او مصئون ځای ته په خوندي توګه ځان ورسوي او هلته خپل هدف په نښه کړي.
دوی په داسي حال کې عمري عملياتو ته وړاندي شول چې نه يوازي له پوځي زده کړو فارغ دي، بلکه عملا يې هم د جګړو په ميدانونو کې له ورزده شويو تاکتيکونو کار اخيستی او اوس د اسلام او وطن د يو مجرب ساتونکي ځوان په حيث په عمري عملياتو کې شرکت کوي.»
د یادولو ده، چې د طالبانو د نویو پسرلنیو عمري عملیاتو موخه د ولایتونو سقوط یاد شوی دی.
د طالبانو له لورې د دغو سرتېرو انځورنه مونږ ته هم رالېږل شوي دي، چې د تمرین او زدکړې په حال کې لیدل کیږي، له تاسو سره شریکوو.
