رسا: د تجارت وزارت یوه ساتونکي په یوه خارجي باندې ډزې کړې وې

کابل ټکی کام فرید احمد
د تجارت او صنایع وزارت وزیر همایون رسا وايي چې ددې وزارت یوه ساتونکي په یوه خارجي میلمه باندې ډزې وکړي خو د ټوپک د بندښت له وجې نوموړی په دې ونتوانید چې خارجي میلمه له مینځه یوسي.
تېره ورځ ښاغلی رسا د وکیلانو ته د یوې پوښتنې په ځواب کې یوازې دومره وویل چې په یوه خارجي میلمانه یې د یوه پولیس له لوري د ټوپک ډزې شوې وې خو دا یې په ډاګه نه کړه چې خارجی څوک او د کوم ځای و.
له ښاغلي رسا ددې سوال په ځواب کې چې ولې شخصي پولیس پدغه وزارت پيره داري کوي وویل:
«یوه ورځ له خارجي همکارانو څخه یو میلمه وزارت ته راغلی وه، کله چې له وزارت څخه دباندې ووت، پرې ډزې وشوې. د وزارت یوه ساتونکي پدغه کس باندې ډزې کړې وې خو دا چې د پولیس ټوپک بند شوی وو، خارجي میلمه روغ رمټ د پېښې له ځایه ووت.»
وزیر دا خبرې په داسې حال کې بیان کړي دي چې د ۱۳۹۰ کال د حوت په میاشت کې دوه خارجیان د کورنیو چارو وزارت دننه ووژل شول. دغه دوه نفره امریکايي مشاورین وو. چې دواړه د یوې ښځينه پولیسې له لوري وژل شوي وو.
په افغانستان کې د خارجیانو پر وړاندې حساسیتونه ډېر زیات دي او حتي هغو کسانو چې د خارجیانو تنخوا خوري او هغوی روزلي دي هم له اشغالګرو خارجیانو څخه نفرت کوي او همېشه یې د خپلې شپیلۍ نښه ګرځوي.