کابل ټکی کام ۳۰وږی/۱۳۹۴
راپور: قدرت الله حسین
په افغانستان کې د ناټو يوه قوماندان ويلي دي، په دې هېواد کې د اربکيانو د بچه بازۍ او جنسي تېريو پر ضد د سخت دريځ نيولو له کبله له پوځه وشړل شوم او د افغانستان پرېښودو ته اړ شوم.
دغه قوماندان کپتان ډن کوين نومېږي او له نيو يارک ټايمز ورځپاڼې سره په خبرو کې يې څرګنده کړې ده، چې په خپله يې په افغانستان کې د اربکيانو بچه بازي او جنسي تېري ليدلي دی، په اړه يې اورېدلي دي او د ډېرو هلکانو او نجونو کورنيو ورته شکايتونه ور وړي دي.
د امريکا د ځانګړو ځواکونو دغه کپتان نيو يارک ټايمز ته ويلي دي، چې له دې امله چې د اربکيانو د دغو کارونو پر ضد مې دريځ سخت و، له دندې وشړل شوم او د افغانستان پرېښودو ته اړ شوم.
کپتان د بېلګې په توګه د ځنو پېښو يادونه کړې ده، چې يوه يې په هلمند کې د اربکيانو د يوه قوماندان سرور جان په نامه د هلک نيولو او ساتلو پېښه وه.
ډن کوين وايي، له ډېرو شکايتو وروسته يې دغه قوماندان وروباله، ويې واهه او ويې شاړه، خو د دې کار له امله له افغانستانه وتلو او د پوځ پرېښودلو ته اړ شو.
د افغانستان د اربکيانو عمومي قوماندان عليشاه احمدزی له دې سره سره هم وايي، چې د اربکيانو ليکې له دغو ډول کارونو پاکې دي، خو د افغانستان د ګڼو سيمو خلک د سيمه ييزو پوليسو په اړه دغه ډول بې شمېره شکايتونه لري، خو دولت په دې اړه د چا خبرو ته غوږ نه نيسي.
د سيمه ييزو پوليسو نږدې ټوله برخه د پخواني جنګسالارانو کسان او د کليو او ښارونو هغه وزګار ځوانان جوړوي، چې په ډول ډول نشو او بدو خويونو روږدي دي او د ولسي وګړو په وژلو، وهلو ټکولو او آن د ناموس پر لوټلو ايسار نه دي.
