کابل ټکی کام ۱۲غويي/۱۳۹۵، احمدالله مهاجر
پاکستاني رسنیو د پاکستان د یو شمېر چارواکو له قوله لیکلي دي، چې ناروغ افغانان له پاسپورټ او وېزې پرته د درملنې لپاره ورتللی شي.
د پاکستان دغه پرېکړه داسې مهال ترسره کیږي، چې څو ورځې وړاندې افغانستان له پاکستان څخه غوښتنه کړې وه، تر څو ناروغ افغانان له وېزې او پاسپورټ پرته خپلې خاورې ته پرېږدي.
پاکستاني چارواکو ویلي دي، چې دغه پرېکړه یې د بشري همدردۍ له کبله کړې ده.
له دې څخه وړاندې پاکستاني چارواکو په ډېره جدي توګه ویلي وو، چې هېڅ داسې افغان په خپلې خاورې ته پرېنږدي، کوم چې قانوني اسناد ونه لري، مګر د افغانستان له وړاندیز وروسته یې په خپله پرېکړه کې نرمښت ښودلی دی.
پاکستان له دغې جدي پرېکړې وروسته ګڼ شمېر افغانان له خپلې خاورې څخه بهر کړل، چې د دوی اقتصاد ته یې ستره ضربه رسولې ده.
د یو شمېر پاکستاني رسنیو له قوله، که له دې وروسته پولیس له افغانانو سره سم چلند ونه کړي، نو د دوی اقتصاد به نور مخ په ځوړند روان شي.
د یادولو ده، د پاکستاني پولیسو ناوړه چلند افغان مهاجرین دې ته اړ ایستي دي، چې په دې بدو شرایطو کې هم خپل جنګ ځپلي هېواد ته ستانه شي.
