کابل ټکی کام سه شنبه فرید احمد
اسلام آباد په امریکا کې د جمهوري غوښتنوکو ګوند مخکښ کاندید چې په نړی کې په بداخلاقی او کم عقلتوب شهرت لري ویلي دي چې پاکستان د امریکا مستعمره نده چې هره خبره به یې ومني.
د جمعې په ورځ ډونلډ ټرمپ له یوه تلویزیون سره په مرکه کې خبریال ته ډاډ ورکړ چې کله هم ولسمشر شي نو په دوه دقیقو کې به پاکستان دې ته جوړ کړي چې ډاکټر شکلیل افریدي له زندان څخه خوشی کړي.
ښاغلی ټرمپ په دوه دقیقو کې د خپل کار د اجراء وجه دا ښيې چې پاکستان له امریکا څخه په لوړه پيمانه انکشافي کمکونه ترلاسه کوي.
خو د ټرمپ دې خبرو د پاکستان غوسه پارولې ده، او په غبرګون کې یې ویلي دي چې پاکستان د امریکا مستعمره نده چې ددوی په زړه کارونه دې پکې ترسره شي.
چوهدري نثار وویل:
«د ټرمپ به ناسم درک کې وایو چې پاکستان د امریکا مستعمره نده.»
نثار وویل چې د ډاکټر شکلیل افریدي مسئله به د پاکستان قضایه قوه حل کوي نه ټرمپ، که څه هم هغه ولسمشر شي.
چوهدري نثار دغه خبرې د اسامه بن لادن د پنځم تلین په مناسبت په یوه جوړه شوې غونډه کې کړي دي.
امریکا وايي چې اسامه بن لادن یې په ايبټ آباد کې په یوه کور کې د ډاکټر شکیل افریدي په همکارۍ وموند او هلته یې وواژه.
واشنګټن ډاکټر شکیل افریدي ته د یوه قهرمان په سترګه ګوري خو پاکستان نوموړی له لشکر طیبه سره په تړاو په ۳۳ کاله بند محکوم کړی دی.
ښاغلی ټرمپ چې د مسلمانانو سرسخت دښمن یادیږي وايي چې په افغانستان کې به د ډېرې مودې لپاره پاتې کیږي ځکه چې افغانستان له پاکستان سره چې اتومي اسلحه لري، اوږده پوله لري.
