کابل ټکی کام ۲۸غويي/۱۳۹۵، احمدالله مهاجر
ارګ: د سولې د څلور اړخیزې غونډې په پنځم پړاو کې ګډون د وخت ضیاع ده
د ارګ د ویاند مرستیال داوود جان مینه پال رسنیو ته ویلي دي، تر څو چې پاکستان پر خپلو ژمنو عمل نه وي کړی، په اسلام اباد کې د سولې د څلور اړخیزې غونډې په پنځم پړاو کې ګډون د وخت ضیاع ده.
مینه پال وایي، د پاکستان په وړاندې د افغان حکومت دریځ بدلون موندلی دی.
مینه پال ویلي دي، چې د سولې د څلور اړخیزې غونډې په پنځم پړوا ناسته کې د افغان چارواکو د ګډون پرېکړه لا نه ده شوې.
مینه پال وویل، په دغه ناسته کې به ډاکټر عمر زاخېلوال ګډون وکړي، چې په اسلام اباد کې د کابل سفیر دی.
« له بده مرغه پاکستان چې کومې ژمنې په دغو ناستو کې کړې وې په هغې یې عمل ونه کړ، د افغانستان دریځ یې په وړاندې بدلون وموند او تر کومه چې موږ عملاً د پاکستان ژمنې ونه ګورو افغان حکومت حاضر نه دی چې د خبرو په نوم خپل وخت ضایع کړي.»
باید ووایو، د پاکستان د بهرنیو چارو وزارت ویاند محمد نفیس ذکریا رسنیو ته وویل، چې د افغان سولې خبرې به د می میاشتې په اتلسمه نېټه پلازمینه اسلام اباد کې ترسره شي.
د یادولو ده، د طالبانو له لورې د کابل د ملي امنیت پر لسم ریاست د برید له کبله د افغان حکومت دريځ د پاکستان په وړاندې بدلون موندلی دی.
