د بغلان سرخ کوتل سیمه د طالبانو لاسته ورغلې
کابل ټکی کام ۲۹غويي/۱۳۹۵، احمدالله مهاجر
د بغلان ولایت امنیتي سرچینو رسنیو ته ویلي دي، چې د دغه ولایت سرخ کوتل سیمه د طالبانو لاسته ورغلې ده.
سرچینو ویلي دي، طالبانو امنیتي ځواکونه له څلورو ورځو راهیسې تر کلکې محاصرې لاندې راوستي وو، چې بالاخره امنیتي ځواکونو د ځان ساتنې لپاره دغه سیمه پرېښوده.
یوې امنیتي سرچینې چې له نوم اخیستو څخه یې ډډه کړې ده، رسنیو ته ویلي دي، چې نن سهار طالبانو د بغلان ولایت په سرخ کوتل او چشمه شیر سیمو باندې درنده جګړه پيل کړه، چې له کبله یې امنیتي ځواکونو عقب نشیني وکړه، او د سرخ کوتل سیمه د طالبانو لاسته ورغله.
د بغلان ولایت څخه د پولیسو یوه ویاند رسنیو ته وویل، چې وژل شوي او ټپيان شوي پولیس یې خپله لیدلي دي، خو د محاصره شویو پولیسو له حاله نا خبره ده.
له بلې خوا طالبان وایي، چې د چشمه شیر سیمې اړوند د جرمن غونډۍ مهم بېس یې نیولی دی، او همدا راز یې لسګونو عسکرو، پولیسو او اربکیانو ته مرګ ژوبله اړولې ده.
