کابل ټکی کام ۰۱چنګاښ/۱۳۹۵، سمسور ګیلاني
داعش ډله غواړي، چې د قرانکریم د یو شمېر سورتونو ایتونه حذف، او یا له سره کتابت کړي، د دوى په اند، اوسني قرانکریم کې مسیحیانو او شیعه ګانو ته د خدمت لپاره، پخوانيو علماوو تحریف کړی دی.
الرأی تونس ورځپاڼې د ترکیې د یوې خبرپاڼې په حواله لیکلي دي، چې د داعش ډلې مشران غواړي، د قرانکریم د یو شمېر سورتونو ایتونه حذف، یا له سره کتابت کړي.
د دوى په وينا، داعش ډله اراده لري، تر څو د قرانکریم د یو شمېر سورتونو ایتونه د الکافرون او د التطهیر ایتونو په شمول حذف، یا له سره کتابت کړي.
داعش ډله ادعا کوي، چې د یو شمېر روحانیونو له لورې په قرانکریم کې مسیحیانو او شیعه ګانو ته د خدمت کولو لپاره تحریف شوی دی، چې د هغې اصلاح پر «مونږ» واجب ده.
دغې ترکي ورځپاڼې لیکلي دي، چې داعش ډله یو شمېر روحانیون د قرانکریم په تحریف او په ځانګړې توګه د سورة احزاب د ۳۳م ایت په تحریف تورنوي، او وايي، چې اصلاح به یې ضرور وکړي.
د یادولو ده، دغه ډله دغه کړنه داسې مهال ترسره کوي، چې په خپلو فلمونو، کتابونو او ورځپاڼو کې لومړی د قرانکریم ایتونه راوړي، او یوازې په خوله سره د الله تعالی د مقدس کتاب د لوړولو چیغې وهي.
