کابل ټکی کام ۰۱چنګاښ/۱۳۹۵، سمسور ګیلاني
نن به په تاشکند کې د شانهګای د غړیو هېوادونو غونډه پیل شي، چې په دې کې به ولسمشر اشرف غني هم د یو شمېر هېوادونو له ولسمشرانو سره وګوري.
د ولسمشر غني مرستیال ویاند داوود خان مینه پال وايي، چې دغې غونډې ته به ولسمشر غني هم وینا وکړي، او همدا راز به د چین له ولسمشر شي جین پینګ سره د افغانستان او پاکستان پر اړیکو هر اړخیزې خبرې اترې وکړي.
چین د پاکستان سره شپېته کلنه ملګرتیا لري، او پاکستان له هغو لومړنیو هېوادونو څخه دی، چې په ۱۹۵۰ میلادي کال کې یې د چین جمهوریت په رسمیت وپېژانده.
مینه پال وايي:
«ولسمشر غني به د چین، ازبکستان، ترکمنستان او تاجکستان له ولسمشرانو سره خبرې اترې وکړي.»
ده وویل، چې د پاکستان ولسمشر ممنون حسین هم د اشرف غني سره د ملاقات هیله څرګنده کړې، خو تراوسه پورې په دې اړه پرېکړه نه ده شوې.
ده وویل، ولسمشر به د جین پینګ څخه غوښتنه وکړي، چې پر اسلام اباد فشار راوړي ترڅو په افغانستان له لاسوهنې لاس په سر شي.
مینه پال زیاته کړه، چې ولسمشر غني به دغې غونډې ته په وینا کې د افغانستان او سیمې پر امنیت، پر اقتصادي فرصتونو او افغانستان او سیمې ته د ترهګزیزو ګواښونو پر سر خبرې وکړي.
د شانګهای سازمان بنسټ په ۲۰۰۱ میلادي کال کې د چین، روسیې، قزاقستان، قرغزستان، تاجکستان او ازبکستان له خوا کېښودل شو، چې افغانستان، ایران، منګولیا، هند او پاکستان د دې سازمان څارونکي غړي دي.
د یادولو ده، چې د شانګهای په دغه دوه ورځنۍ غونډه کې به د افغانستان پر وضعیت، له ترورېزم سره پر مبارزه او د مخدره مواد د قاچاق د مخنیوي پر لارو چارو خبرې اترې وشي.
