کابل ټکی کام ۰۸چنګاښ/۱۳۹۵، احمدالله مهاجر
د افغانستان د حراست او ثبات شورا د سیاسي دفتر رئیس ښاغلي عمر داوودزي تېره ورځ د چنګاښ په ۷مه نېټه یوې خبري ناستې ته د وینا پر مهال وویل، چې د ملي یووالي حکومت یو مصلحتي او مېلمه دی، او یو مصلحتي حکومت هېڅکله هم د تل لپاره د منلو وړ نه وي.
ده د پښتو هغه متل ته په اشارې چې مېلمه د تل لپاره نه وي، وویل، «مصلحتي حکومت یو کال، دوه کاله وي، نه دا چې ټول عمر. دوه کاله بس دي.»
ښاغلي داوودزي د ملي یووالي حکومت مشرانو ته پېغور ورکړ، که په حل لاره یې نه پوهېږئ، بې وسه او ناتوانه یاستئ، تجربه کاره نه وی، مېلمه یاستئ، له مونږ څخه د مرستې طلبګار شئ، چې مرسته مو وکړو.
د ښاغلي داوودزي دغو څرګندونو ته د ولسمشر غني مرستیال ویاند شاه حسین مرتضوي بي بي سي ته وویل، چې د افغانستان اساسي قانون د ولسمشر د کار موده او د ولسمشریزو ټاکنو وخت په څرګند ډول بیان کړی دی، ښاغلی داوودزی دې اساسي قانون ته مراجعه وکړي.
مرتضوي د داوودزي د څرګندونو په وړاندې د ولسمشرۍ ماڼۍ نظر داسې ورکړ:
«د حراست او ثبات شورا د سیاسي دفتر رئیس او څوک چې ده ته ورته نظر لري، له اساسي قانون څخه سم درک نه لري.»
د حراست او ثبات شورا ډېری غړي د ملي یووالي حکومت پلویان وو، خو په دې وروستیو کې یې د ملي یووالي حکومت پر هغو پرېکړو او کړنو انتقادونه کوي، چې ناشنا او د شرم وړ وي.
دغه شورا د تېر کال د لېندۍ میاشتې په ۲۷مه نېټه د نظام د اصلاح په موخه جوړه شوه.
پخوانی جنګسالار عبدرب الرسول سیاف، د پخواني ولسمشر کرزي لومړی مرستیال محمد یونس قانوني، د اقتصاد پخوانی وزیر عبدالهادي ارغندیوال، د دفاع پخوانی وزیر بسم الله محمدي، د ولسي جرګې رئیس عبدالرووف ابراهیمي، د اوبو انرژۍ پخوانی وزیر محمد اسماعیل خان، د کورنیو چارو پخوانی وزیر محمد عمر داوودزی او یو شمېر نور پخواني جنګسالاران د دغې شورا غړیتوب لري.
