کابل ټکی کام ۱۳۹۵ چنګاښ ۱۱ زرغون خوږیاڼی
د طالبانو وياند ذبيح الله مجاهد رسنیو ته په لیږل شوې خبر پاڼه کې ویلي، چې تېره شپه د دوی جنګياليو د حصارک ولسوالۍ پر امنیتي پوستو برید وکړ،۴ پوستې يې ونیولې او د ۴ قوماندانانو مختار، سهیل، حمزه اواعظم په ګډون يې ۱۱ اربکيان وژلي او ۲۵ نور يې ټپيان کړي دي.
طالب ویاند زیاتوي، چې په سیمه کې جګړه اوس هم روانه ده او هوايي ځواکونه په بې رحمانه توګه د عامو خلکو کورونه په نښه کوي، چې تر اوسه یې یو شمېر ښځې او ماشومان هم ټپیان کړي دي.
مجاهد د خپلو ۲ ملګرو د وژل کېدو او ۳ نورو د ټپي کېدو پخلی کړی دی.
د حصارک امنيتي چارواکي جګړه تائيدوي او وايي، چې طالبانو تېره شپه د اربکيانو او ملي اردونو پر پوستو بریدونه کړي، څلور امنيتي پوستې يې نيولي او اوس د ولسوالۍ مرکز ته نږدې شوي دي.
د ننګرهار ولایت د والي ویاند عطا الله خوږیاڼی وایي، چې د تېرو څلرویشتو ساعتونو په اوږدو کې د حصارک ولسوالۍ په غرنیو سیمو کې له وسله والو طالبانو سره په مخامخ جګړه او هوایي بریدونو کې ۳۲ طالبان او۲ حکومتي عسکر وژل شوي دي.
خوږیاڼی زیاتوي، چې په دغه جګړه کې څلور پنځوس طالبان او دیارلس حکومتي عسکر ټپیان دي.
د حصارک امنیتي سرچینې وايي که سیمې ته تازه دمي ځواکونه ونه رسیږي، ولسوالۍ به سقوط وکړي.
