سرليکنه
تېره ورځ د پاکستان د بهرنيو چارو وزارت په يوه خبري غونډه کې ويلي چې، د پاکستان اوسني اقتصادي، امنيتي او سياسي وضعيت په نظر کې نيولو سره اړينه ده، چې افغان کډوال په عزت او درناوي سره خپل هېواد ته ستانه شي.
د پاکستان د بهرينوچارووزارت به له افغان حکومت او ملګروملتونو سره د افغان کډوالو د ستونزو د حل پر سیاسي او دیپلوماتیک اړخ بيا خبرې کوي، چې څرنګه افغان کډوالو ته په هغه سيمو کې، چې هلته د کډوالو دستنيدا او اوسيدنې زمينه برابره وي، په تدريجي ډول ورته لاره هواره کړي .
د پاکستان چاراکي د ملګروملتونو سره په دې هم غورکوي، چې په افغانستان کې ستنو شوو کډوالوته دومره اسانتياوې برابرې کړي، چې افغان کډوال په خپله خوښه خپل هېوادته ستانه شي.
په اسلام اباد کې افغان سفارت او دلته په کابل کې د کډوالوچارو وزارت د پاکستان ددې نوې طرحې نه بې خبري ښودلې ده، خو د مخه يي ويلي وو، چې د جولايي د مياشتې په وروستيو کې د پاکستان له حکومت او د کډوالو لپاره د ملګرو ملتونو له ځانګړې ادارې سره د افغان کډوالو پر برخلیک به خبرې وکړي.
د پاکستان صداعظم نوازشرف تيره اونۍ په پاکستان کې يوځل بيا افغان کډوالو ته داوسيدا لپاره شپږ مياشتې نور وخت ورکړ، خو د پاکستان چارواکي وايي، چې څومره شمېر د قانوني افغانانو دی دومره په غيرقانوني ډول په پاکستان کې اوسيږي.
د ملګرو ملتونو د کډوالو د سازمان په وينا په افغانستان کې امنيتي وضعه د کډوالو د بېرته راستنيدا مخه نيولې ده، چې په د۲۰۱۵ميلادي کال کې ٨٥٠٠٠ زره افغانان افغانستان ته راستانه شوي دي.
کومه خبره چې پاکستان ملګرو ملتونو ته کړې ده له دې نه دا بريښي، چې افغان کډوال به تر ٢٠٢٠پورې افغانستان ته راستانه نه شي، هغه په دې دليل چې ترڅو په افغانستان کې امريکايي پوځونه موجوديت لري په افغانستان کې امن نه شي راتلاې او لکه څرنګه چې اوس په افغانستان کې هره سيمه نا امنه ده تر دوه زره شل پورې به هم نا امنه وي.
که څه هم پاکستان تر اوسه پورې دا نه دي ويلي، چې به اجباري توګه به افغان کډوال له پاکستانه ووستل شي، خو دا چې پاکستان په افغانستان کې د امن او قرارۍ سيمو يادونه کړې ده دا به غيرممکنه شي، چې په افغانستان کې د بهرنيو پوځونو په موجوديت دې په ځينو سيمو کې کډوالو ته دستنيدا زمينه برابره شي.
د ملګرو ملتونو د کډوالو د سازمان دعالي کمشنرۍ مشر فلیپوګراندي، چې په اسلام اباد کې د سرتاج عزيز او عبدالقادربلوچ سره وکتل له هغې دا غرض نه دى، چې افغانان دې د شپږ مياشتې ورکړل شوي مودې وروسته افغانستان ته لازما ستنيږي.
ګراندې ويلي چې کله په افغانستان کې د کډوالو ستنيدوته زمينه برابره شوه بيا به ستنيږي او اوس امنيتي حالات د کډوالو د ستنيدا نه دي.
افغانان خپل هېواد ته په راستنيدلو له پاکستان څخه زيات خوشحاله دي او پاکستان هم بيا بيا وايي، چې افغانان دې خپل هېواد ته ستانه شي.
ملګري ملتونه، پاکستان او د سيمې هيوادونه که په صداقت سره په افغانستان کې د امن او افغان کډوالو راستنيدو ته رښتني وي، په افغانستان کې دې د امن لپاره هڅې وکړي، چې هغه یواځې او یواځې د خارجي قوتونو له افغانستانه وتل دي.
په افغانستان کې امن د پاکستان، د سيمې د هېوادونو او ملګرو ملتونو له رښتني همکاريو بغير نه شي راتلاى.
