ولسمشر غني د پاکستان غبرګون ته غبرګون ښودلی

کابل ټکی کام ۲۱چنګاښ/۱۳۹۵، احمدالله مهاجر
په وارسا غونډه کې ولسمشر غني پاکستان باندې تور ولګاوو، چې دوی د «ترهګرو» تفکیک لا هم په ښه او بد سره کوي، پاکستان د ولسمشر غني دغو څرګندونو ته په غبرګون کې وویل، چې دا ډول خبرې به د اسلام اباد د خفګان لامل شي.
ولسمشر غني دا مهال د پاکستان د بهرنیو چارو وزارت غبرګون ته په غبرګون کې ویلي دي، چې له ده سره بشپړ توضیحات وجود لري، او په اسنادو ثابتولی شي، چې پر هېواد یې له بلې خاورې څخه عملیات طرحه کیږي.
دی چې د پاکستان غبرګون ډېر غوسه کړی وو، وویل: «وسله وال مخالفین نه پلار، نه مور، نه دین، نه مذهب، نه هېواد او نه ولس پېژني، او د سعودي عربستان مدینې منورې ترهګریز برید هم د یوه پاکستاني له خوا ترسره شوی وو.»
ولسمشر غني نن په کابل کې یوې خبري ناستې ته وویل، چې دغه ګاونډی هېواد باید د افغانستان ملي حاکمیت ته درناوی وکړي.
ده وویل، هر هېواد چې لاپخوا يې د «تروریزم» ترمنځ د ښه او بد توپیر کړی دی، تاوان یې لیدلی دی.
ولسمشر غني فتوا ورکوي، چې وسله وال مخالفین د اسلام ضد اعمال ترسره کوي، باید په وړاندې یې مبارزه وشي.