د خوست یوه ښوونځي کې چاودنې، ۴ کسان ټپيان کړي

کابل ټکی کام ۲۱چنګاښ/۱۳۹۵، احمدالله مهاجر
نن سهار د خوست ښار په یوه ښوونځي کې د چاودنې له کبله ۴ کسان ټپيان شوي دي، او روغتون ته لېږدول شوي دي.
له خوست ولایت څخه خبري منابع وايي، چې نن سهار ۸:۳۰ بجې د شهید مطیع الله ښوونځي په یوه ټولګي کې چاودنه شوې ده، چې له امله یې یو ښوونکی او درې زدکوونکي ټپيان شوي دي.
د خوست د ښوونې او روزنې رئیس انجینر بخت نور بختیار وايي، چې دغه چاودېدونکي مواد د شپې په درسي ټولګي کې ځای پر ځای شوي وو.
دی وايي، د پېښې ټپيان روغتون ته لېږدول شوي دي، او روغتیايي حالت یې ښه بلل شوی دی.
د خوست امنیه قومندان مل پاسوال فیض الله غیرت وایي، چې د پېښې په اړه یې پلټنې پیل کړي دي، خو لا تراوسه يې کوم شکمن څوک نه دي نیولي.