طالبان: د کارټر بې ګټې او تکراري خبرې د امریکایانو هېڅ درد نه شي دوا کولای

کابل ټکی کام ۲۳چنګاښ/۱۳۹۵، احمدالله مهاجر
تېره ورځ د امریکا د متحده ایالتونو دفاع وزیر اشټون کارټر افغانستان ته په یوه ناڅاپي سفر کابل ته راغلی وو، او هلته یې د ولسمشر غني سره په مشترکه خبري ناسته کې وینا وکړه.
کارټر په افغانستان کې د امریکایي ځواکونو عمومي قومندان نیکلسن ته صلاحیتونه پراخ کړل، په وارسا غونډه کې پر کړیو تعهداتو تأکید وکړ او افغان ځواکونو ته یې ډاډ ورکړ، چې په راتلونکې کې به هم له دوی سره په څنګ کې ولاړ وي.
طالبانو د اشټون کارټر د دغو څرګندونو په وړاندې توند غبرګون ښودلی دی، او دا یې د امریکایانو تکراري او بې ګټې خبرې بللي دي.
«دا تکراري او بې ګټې خبرې د امریکایانو هيڅ درد نشي دوا کولای، ځکه دلته يې ډير قومندانان ستړي شوي، ډير عسکر يې لیوني شوي ، وژل شوي او ټپيان شوي، ډير اختیارات يې کاریدلي او ډيرې لاپې وهل شوې دي.».
طالبانو امریکايي چارواکي ته په وینا کې ویلي دي، چې باید له خپلو پخوانیو سلفو څخه یې څه زدکړي وای.
طالبانو امریکایي مشرانو ته وریاده کړې ده، چې د دوی مبارزه به تر هغو پورې دوام لري، تر څو یې چې په هېواد کې بشپړ اسلامي نظام او ازادي نه وي راغلي، او په دغه لاره کې هېڅ ډول تهدید د دوی په مبارزه کې خنډ نه شي راوستی.
«امریکایي مشران باید دتشو خبرو پرځای حقائق درک کړي، اشغال پای ته ورسوي او ځان ته له دې لوی اونړیوال شرم څخه په معقول او منطقي ډول نجات ورکړي.».
طالبانو د کارټر له لورې خپلو ځواکونو ته د نورو اختیاراتو ورکولو په اړه ویلي دي، چې نویو اختیاراتو به هغه وخت تاثیر کړی وو، چې دوی په ۲۰۰۱ میلادي کال کې د دوی وحشت، ظلمونه او بمبارۍ نه وای لیدلې.
«د څو سوه عسکرو په لرې سیمه کې ځای پرځای کول، او خپل قومندان ته د وژنو او لا ډير وحشت په اړه اختیاراتو ورکولو به هلته تأثيردرلودای چې موږ ستاسو د ۲۰۰۱ کال وحشت، ګوانتانامو، بګرام، چاپې او په بمبارونو کې دکلیو او ښارونو نړول نه وای لیدلي.».