یونان: د کډوالو تښتوونکې ډله نیول شوې ده

کابل ټکی کام ۲۴ چنګاښ/۱۳۹۵، سمسور ګیلاني
په یونان کې هغه ډله نیول شوې ده، چې په ځانګړې توګه به یې کډوال تښتول، او د خوشي کولو په بدل کې به یې پسې ور څخه غوښتې.
دغه ډله وروسته له هغې په اختطاف کار پيل کړ، چې یونان ته د کډوالو د تېرېدو په برخه کې یې مرسته کوله، او په دغه برخه کې یې پوره اعتماد ترلاسه کړی وو.
خبرونه وايي، د دغې ډلې مشري څلورو پاکستانیانوکوله.
دغه ډله د دغه هېواد په سیلانیک ښار کې د پولیسو له خوا د ۳ پاکستاني کډوالو له شکایت وروسته ونیول شوه.
پولیس وایي، د دغې ډلې د نیولو په موخه یې د شکایت کوونکو کډوالو په مرسته عملیات پیل کړل، او دغه ډله یې ونیوله.
دوی وایي، نیول شوي اختطافګر ۶ کسیزه ډله ده، چې ۴ تنه پاکستاني وګړي هم پکې شامل دي.
دغې ډلې د سیلانیک ښار په بهرنۍ یوې لرې پرتې سیمه کې د مالدارۍ یو فارم کې زندان جوړ کړی وو، چې هلته به یې بندیان ساتل.
خبرونه وایي، دغې ډلې به کډوال د مرستې په موخه دغه فارم ته راوستل، وروسته به یې کانټینرانو کې زنداني کول، له وهلو او ټکولو وروسته به یې کورنیو ته د دوی د خلاصون په بدل کې د پیسو وړاندیز کولو.
پولیس وایي، د دغو اختطافګرو سره یې د مالدارۍ د فارم ۵۲ کلن خاوند هم نیولی دی، او ګڼ شمېر نور تښتوونکي کډوال یې هم ژغورلي دي.