دولتي چورلکو یو ځل بیا د طالبانو انتقام له ملکي وګړو واخیست

کابل ټکی کام ۲۷چنګاښ/۱۳۹۵، احمدالله مهاجر
د دایکندي ولایت په اجرستان ولسوالۍ کې افغان دولتي چورلکو وروسته له هغې بمبار وکړ، چې طالبانو پر دولتي مرکزونو باندې بریدونه وکړل.
دغه بمبار د دغې ولسوالۍ اړوند په محمد خېلو سیمه کې شوی دی.
دغه بمبار د طالبانو د هغې جګړې په غبرګون کې شوی دی، چې پرون سهار یې پر دولتي مرکزونو پیل کړه، ۴ مرکزونه یې ونیول، مهم اربکیان یې ووژل او ګڼې وسلې یې ترلاسه کړې.
دغه جګړې تر ۱۱:۰۰ بجو پورې دوام وکړ.
تازه خبرونه وایي، چې له جګړې وروسته د افغان پوځ چورلکو د طالبانو څخه د انتقام په موخه د ملکي خلکو پر کورونو بمبار وکړ.
د دغه بمبار په پایله کې د یوه سیمه ییز اوسېدونکي دین محمد په کور کې یوه مېرمن وژل شوې او ۳ ماشومانې ټپیانې دي.
همدا راز د یوه بل سیمه ییز اوسېدونکي فضل محمد اکا په کور کې هم دوې مېرمنې وژل شوي او دوه نورې ټپيانې دي.