کابل ټکی کام ۱۳۹۵ زمري ۱ بصیراحمد پاڅون
په پروان کې عسکرو د جنازې ۲۱ تنه ګډون وال مړه او ژوبل کړي دي.
د پروان ولایت سیدخیل ولسوالۍ په انچو سیمه کې عسکرو پر هغه کسانو نن غرمه ناڅاپه ډزې وکړې چې د یو طالب پر جنازه راټول شوي و.
له ډزو وروسته د جنازې ګډونوال په احساساتو راغلل، د ملي وحدت حکومت، امریکایي او د ناټو پوځیانو پر ضد یې شعارونه ورکړل.
عسکرو د خلکو دا احساسات ونه زغمل او د خپلو وسلو خولې پر خلکو راواړولې، ۶ تنه هیوادوال یې شهیدان او ۱۵ تنه نور یې ټپیان کړل.
د امریکا پوځي یرغل وروسته د افغانستان عام خلک د وژل شویو عسکرو پولیسو او اربکیانو جنازو ته نه ورځي مګر د طالبانو د وژل شویو کسانو جنازې ته په ډیره مینه او رغبت ځانونه رسوي.
دوې ورځې وړاندې د حکومت د علماؤ شوری رئیس چې زیات شمیر ملایان هم ورسره و په ارګ کې د ملي وحدت حکومت مشر محمد اشرف غني ته وویل چې عسکر او پولیس شهیدان دي مونږ به یې خلک جنازو ته وهڅوو.
خو له عامو خلکو سره دا پوښتنه پیدا شوي چې هغه وژل شوي خلک څنګه شهیدان کیدای شي چې د امریکا او ناټو په قومانده د امریکا له دښمنانو او په ټوله کې له طالبانو سره په جګړه کې ووژل شي؟
لس ورځې وړاندې امریکا او ناټو دا فغانستان حکومت وسلوالو ځواکونو لپاره په کال کې پنځه ملیارده ډالر ومنل تر څو له طالبانو سره مؤثره جګړه وکړي.
پنځه ورځې وړاندې په افغانستان کې د امریکایي عسکرو قوماندان جنرال نکولسن د افغانستان وسلوالو ځواکونو ته قومانده ورکړه چې پر طالبانو تهاجمي بریدونه وکړي.
که د ملي وحدت حکومت وسلوال ځواکونه د خلکو احساسات ونه زغمي کیدای شي پرخلاف یې ولسي خلک وسلوال مقاومت پیل او د طالبانو لیکې نورې هم پیاوړي کړي.
