(کابل ټکی کام ۱۳۹۵ زمری ۲۰) الماس خدرخېل
د ملګرو ملتونو مرستندوی دفتر يوناما وايي، افغانستان کې فساد ځکه ډېر شوی چې حکومت د فساد پر وړاندې د مبارزې اراده نه لري او ان امنيتي پوستونه د خاصو کړيو تر منځ پلورل کېږي.
د يوناما ځانګړي استازي مايیکل هارډمن پرون په کابل کې د اصلاحاتو راوستلو په اړه په جوړ شوي کانفرس کې وويل: ((په افغانستان کې سیاسي ژوند د اړیکو پر اساس ولاړ دی او دا هغه څه دي چې د حکومت او خلکو ترمنځ یې واټن زیات کړی، دندی، قراردادونه، لایسنونه او داسې ډیر مسایل د یو شمیر کړیو ترمنځ ویشل کیږي چې ستونزې يې جوړې کړي دي، هارډمن زياته کړه، چې مونږ خبر لرو چې آن د پولیسو چوکۍ هم پلورل کیږي))
نوموړي وويل، چې له فساد سره مبارزه د ګډ حکومت له لومړیتوبونو څخه وه، خو د ګډ حکومت مشرانو په دې برخه کې یوازې پر شعارونو او نمایشي کارونو اتکا کړې او په عمل کی یې د پام وړ څه نه دي کړي.
د یوناما استازي وايي، چې ډېر حکومتي لوړ پوړي چارواکي په فساد کې لاس لري خو لا تر اوسه محاکمه شوي نه دي.
د سوداګرۍ وزارت مرستیال خانجان الکوزی وايي، چې د اصلاحاتو په پلمه ورباندې سخت قوانین منل کېږي، چې ډېری پانګه وال او سوداګر یې د خپلو جوازونو لغوې ته مجبور کړي دي.
بايد وويل شي چې، د روڼتیا نړيوال سازمان د راپور له مخې افغانستان په ۲۰۱۵ میلادي کال کې د نړۍ په کچه د اداري فساد له پلوه دریم فاسد هېواد پېژندل شوی و.
