قرغيزستان: د چين سفارت مخې ته موټربم بريد شوی
(کابل ټکی کام ۱۳۹۵وږی ۹) الماس خدرخېل
د قرغيزستان رسنيو خبر ورکړی، چې په ياد هېواد کې د چين سفارت تر مخه موټربم بريد شوی.
امنيتي چارواکو ويلي، چې يو کس له بارودو ډک موټر ته هغه وخت چاودنه ورکړه، چې غوښتل يې د چين سفارت ته د ننه شي.
ځايي پوليس وايي، چې په چاودنه کې د سفارت دوه کارکوونکي سخت ټپيان دي او بريد کوونکی وژل شوی.
پوليسو د چاودنې ځای کلابند کړی او په دغه سيمه کې د موټرو تګ راتګ ته اجازه نه ورکوي. د چاودنې له کبله د نژدې ودانیو د کړکیو ښیښې هم ماتې شوې دي.
د پېښې ځای ته امبولانسونه ورغلي، ترڅو ټپيان روغتون ته د درملنې په موخه يوسي.
د قرغيزستان د روغتيا وزارت ويلي، چې په چاودنه کې لږ تر لږه يو کس وژل شوی دی.
د قرغيزستان د کورنيو چارو وزارت ويلي، چې دا يو سرتېری بريد و، چې بريدګر خپل موټر د سفارت له دېوال سره جنګولی دی.
تر دې دمه رسمي سرچينو دا جزييات نه دي تائيد کړي.
قرغیزستان په منځنۍ اسیا کې د پخواني شوروي اتحاد یو جمهوریت و چې د ۱۹۹۱ کال اګسټ کې یې خپله خپلواکي اعلان کړه، نوموړی هېواد له ازبکستان، قزاقستان، تاجکستان او چين سره ګاونډی دی.
