پیښور کې د عیسویانو پر کالونۍ ډله اییز برید شوی
(کابل ټکی کام ۱۳۹۵ وږی ۱۲) زرغون خوږیاڼی
ویل کیږي چې سهار ۶ بجې د پیښور ښار په ۱۵ کیلو مترۍ کې د کرېسچیین په عیسوي کالونۍ ډله اییز وسله وال برید شوی، چې سیمې ته د امنیتي ځواکونو په رسیدو سره سم له برید ګرو سره په جګړه کې ښکیل شوي دي.
د معلوماتو له مخې ۴ تنه برید کوونکي یادې کالونۍ ته د ننوتو سره سم په امنیتي ځواکونو او شاوخوا ډزې پيل کړې.
د پیښې نه سمدلاسه وروسته د پوځ سرتیري سیمې ته راورسیدل او د برید کوونکو سره په نښته کې ښکیل شول، امنیتي ځواکونو ویلي، چې ۴ واړه بریدګر یې له منځه وړي دي.
عیني شاهدانو خبري رسنیو ته ویلي دي،چې په کالونۍ کې د ۵ چاودنو غږونه اوریدل شوي دي، چې ښايي یو زیات شمیر کسان په کې وژل شوي وي.
ویل کیږيو چې بریدګر په ماشیندارو او راکټونوسمبال و، د سیمې په امنیتي ځواکونو یې د راکټونو بریدونه هم کړي دي، ځینیو یې ځان ته چاودنه ورکړې ده.
ځايی پولیسو ویلي دي، چې په دې پيښه کې د کالونۍ یو تن عیسوي وژل شوی او دوه تنه پولیس ټپیان دي.
د پاکستان د پوځ ویاند جنرال عاصم باجوه په خپله ټویټر پاڼه کې لیکلي دي، چې د سهار په وختي ساعتونو کې ۴ تنو بریدګرو د پیښور د ورسک ډیم په سیمه کې د مسیحیانو په کالونۍ ډله ایز برید وکړ، چې ټول برید کوونکي د امنیتي ځواکونو لخوا له منځه وړل شوي دي.
باجوه ویلي، چې ۲ تنه بریدګرو ځانونو ته چاودنه ورکړې ده او ۲ تنه نور د امنیتي ځواکونو سره په جګړه کې وژل شوي دي.
په ځینو رسنیو کې د برید کوونکو شمېر۶ تنه ښودل شوی دی.
تر اوسه د یاد برید پړه چا نه منلې.
