سرلیکنه
په افغانستان کې به چې په ولسي کچه یو شخص میړنی، میلمه پال، خوله ور، جرګه مار، ټوپکمار او ښکر اړمی و خلکو به ویل دامهمه کله (سر) ده، هرڅوک دده په شان حوصله او صلاحیتونه ، نه شي لرلای.
تیره ورځ راپورونه ورکړل شول، چې د حبیب الله کلکاني یا بچه سقاو د هډوکو او کلې د بیا خښولو پر سر جګړه شوې ده، چې په ډزو کې یو شمیر کسان مړه ا ژوبل شوي هم دي.
د شمالي ټلوالې مشران او قوماندانان چې هر یو ېې ځانته یوه کله وایي، په عیدګاه جومات کې ېې د بچه سقاو د خیالي جنازې ورسته هوډ وکړ، چې د کلکاني کله او هډوکي به د کابل په شهرآ راغونډۍ خښوي.
د شمالي ټلوالې مشرانو او قوماندانانو پتییلې وه، چې په عیدګاه جومات کې د بچه سقاو یا کلکاني د خیالي جنازې وروسته به د کلکاني مړی د کابل ښار په شهر ارا تپه کې یو ځل بیا خاورو ته وسپاري؛ خو دا چې شهرا را تپې ته د کلکاني د کلې او نورو هډوکو د رسولو د مخه د دوستم ټوپکوالو غوڼدۍ نیولې وه، ویل ېې چې هیڅ چاته به په دې غونډۍ کې د چا مړي او په تیره بیا د دې بدنامې څیرې د خښولو اجازه ورنه کړي .
د شمالي ټلوالې سیاسي او نظامي کلې، چې دوستم هم ځانته یوه کله وايي په وړاندې ېې تر څه وخته پورې پاتې راغلې او د کلکاني مړي یې د شهرارا په کوڅه کې ایښي وو.
یو تن د ګل حیدر په نامه قوماندان چې ځان شمالي ټلوالې ته منسوبوي هغه هم د دوستم په مقابل کې خانته یوه کله وایي، دوستم ته ېې اختار ورکړی و، که خپلې قواوې له شهرا را غونډۍ راکښته نه کړي جسدونه به ېې ور ولیږي، ویل کیږي چې د شمالي ټلوالې پنجشیري قوماندان هم سیمي ته خپلې قواوې ورلیږلي دي، ددې تاوجنو حالاتو په دوام که د کلکاني پرکله د کلو د زور ازمايي جګړه پیل شوه ډیرې کلې به له منځه ولاړې شي.
د شمالي ټلوالې او د کلکاني د پلویانو یو بل پخوانی قومندان امان الله هم د شهر ارا تپې ته ځان د خپلو وسله والو سره رسولی و، هغه هم هڅه کوله چې شهرا را تپه د دوستم له ملیشو خالي کړي او د کلکانی کله او نور هډوکې په دوېم ځل په یاده تپه کې خښ کړي.
د کلکاني جسد او کله په شهر آرا تپه کې په توره شپه کې ښخ شو؛ دوستم او په ده پورې مربوط وسله والو ویلي دي، چې دوی فکر کاوه د کلکاني کله په شهر ارا غونډۍ کې دننه په قلعه کې ښخوي؛ خو اوس چې پوه شول د کلکاني کله او ملګري يې د غونډۍ په یوه اړخ کې ښخوي نو يې ورته د تدفین اجازه ورکړه او د دوستم ملیشو شاتګ وکړ.
که د دواړو خواو چې هر یو ېې خانته کله وایي راپورونو ته په غور نظروکړو، کابل د یوه بل انساني ناورین سره مخ کیدونکی دی په دې اړه باید حکومت او یا منځګړي اشخاص یوداسې پریکړه چې پرخپله خاوره اوملي ارزښتونو دسر ورکوونکو او د خاورې د پلورونکو ترمنځ توپیر وکړل شي، یوه پریکړه وکړي ترڅو په راتلونکي کې د انسانی ناورین د رامنځ ته کیدو مخه ونیسي .
خداې مکړه که د دواړو خواو ترمنځ بیا داسې څه پیل شي، نو نه یواځې داچې د مقابلو لورو کلې (سرونه) به پکې په خاورو او وینوولړل شي بلکه هغه افغانان چې نه غواړي په یوه بله ژبنۍ، سیمنۍ او ټبرنۍ جګړه کې راښکیل شي هغه به هم دکلکانی پرکله (سر) د جګړې په اور کې وسوزي.
