پیښور: مردان کې پر محکمه برید، ۵۰ کسانو ته مرګ ژوبله اوښتې ده
(کابل ټکی کام ۱۳۹۵ وږی ۱۲) زرغون خوږیاڼی
د پيښور په مردان کې دوو سرتیرو بریدګرو د محکمې پر ودانۍ برید کړی، چې په کې ۱۰ تنه وژل شوي او تر ۴۰ نور ټپیان دي.
د مردان د پولیسو مشر فیصل شهزاد رسنیو ته ویلي، چې یو بریدګړ لومړی د محکمې پر دروازه د لاسي بم برید وکړ، دده په وینا په دې برید کې د دروازې یو شمېر پولیس ټپیان شول.
دویم بریدګر د محکمې ودانۍ ته ننولی او د محکمې په دویمه دروازه کې یې په ځان پورې تړلو چاودیدونکو توکو ته چاودنه ورکړې ده، چې په کې په لسګونوکسانو ته مرګ ژوبله اوښتې.
د ځايي پولیسو په وینا په وژل شویو کې ولسي وګړي، پولیس او وکیلان شامل دي.
د پولیسو په وینا ټپیان د مردان لویو روغنتونونو ته وړل شوي، چې د ۶ ټپیانو روغتیايي حالت د اندیښنې وړ ښودل شوی دی.
د ژغورونکو د ډلو یو تن چارواکي حارث حبیب رسنیو ته ویلي، دا پیښه د مردان تر ټولو په مهمه سیمه کې رامنځته شوې ده، په دې سیمه کې ډیری دولتي ادارې، د پولیسو د مشر کور، د پولیسو تاڼه او پوځی ښوونځی هم شتون لري.
د یادونې وړه ده، چې نن سهار وختي د پيښور په کریسچین کالونۍ هم برید شوی و، چې په کې ۱ تن مړ او ۲ نور ټپیان شوي وو.
د بي بي سي راپور په حواله، د پېښور د کریسچين کالونۍ د برید مسوولیت جماعت الحرار قبول کړی، خو د مردان د برید مسوولیت لاهم کومې ډلې نه دی منلی.
