(کابل ټکی کام ۱۳۹۵وږی ۱۴) الماس خدرخېل
د هرات ولايت د کرکټ نوې اکاډمي تېره ورځ په رسمي توګه د افغانستان د کرکټ بورډ د چارواکو له خوا پرانستل شوه.
د کرکټ دغه اکاډمي څه موده مخکې جوړه شوې او د کرکټ د مينه والو لپاره يې د تمرينونو زمينه برابره کړې وه خو د پرانستې رسمي مراسم يې نن ترسره شول.
کرکټ د افغانانو لپاره په زړه پورې لوبه ده ،دوی تر نور هر ډول سیالیو دا غوره سیالي بولي، افغان کرکټ بورډ مسؤلین کوښښ کوي، چي دهېوادپه مرکزي ولایتونو کې ورته اکاډیمۍ فعالې کړي ،ترڅو ښه لوبغاړي ترې راوباسي.
د افغانستان د کرېکټ بورډ اجرايیوي مشر شفیق ستانکزي، چې په دغه مراسمو کې یې ګډون کړی و د هرات له سیمه ایزو چارواکو وغوښتل، چې په دې ښار کې د کرېکټ یو معیاري ډګر هم جوړ کړي.
کرېکټ د افغانستان په لوېدیځ کی پخوا پېژندل شوې لوبه نه وه، خو په دې ورستیو کلونو کی یې مینه وال په دغه ولایت کې خورا ډېر شوي دي.
په هرات کې د کرکټ نوې اکاډمۍ په پرانستلو سره هراتيانو خوښي څرګنده کړې.
