(کابل ټکی کام ۱۳۹۵ وږی ۱۹) زرغون خوږیاڼی
د شمالي کوریا رسنیو خبر ورکړ، چې د څلورو اتومي ازمایښتونو وروسته نن سهار دې هېواد په خپل تاریخ تر ټولو لوی او کامیاب پنځم اتومي ازمایښت ترسره کړ.
د اوباما د ګواښونو سره سره شمالي کوریا په تیره میاشت کې د درې بالستیکي توغندیو ازمایلو وروسته نن سهار د اتومي بم ازمایښت هم وکړ.
د شمالي کوریا د هستوي بم پوهانو ویلي دي، چې ددې بم ازموینه لس متره لاندې په ځمکه کې د (پانجي ري) په اتومي هډه کې تره سره شوه.
د جنوبي کوریا د خبري اژانس هم وویل، چې د اټومي ازمایښت سره د نوموړي هیواد په شمال ختیځ کې د مځکې لاندې په لس کیلومترۍ کې د ۵ عشاریه ۳ په لویوالي سره زوروره زلزله رامنځته شوه.
د جنوبي کوریا ولسمشره د اسیا په نړیواله سرمشریزه غونډې لپاره لاووس ته تللې وه، چې د شمالي کوریا د اټومي بم د ازمایلو نه وروسته سمدلاسه خپل هیواد ته راستنه شوه.
د جاپان لومړي وزیر شینز هم د شمالي کوریا لخوا د اټومي بم د ازمایښت په اړه سخت غبرګون وښود او یې ویل، چې دا اقدام په هیڅ ډول د منلو وړ نه دی.
د راپورونو له مخې ویل کیږي، چې چاودنه ډيره ځواکمنه وه، چې په سيمه کې یې ۵.۳ درجې شدیده زلزله رامنځته کړه.
شمالي کوریا ویلي دي، چې د اتومي بم پنځم ازمایښت یې په کامیابۍ سره تر سره کړه، دوی منلې چې زلزله د اتومي بم له امله رامنځته شوې ده.
