کندوز: د چاپو پر مهال ۱۱ تنه امريکايي او افغان ځواکونو ته مرګ ژوبله اوښتې
(کابل ټکی کام ۱۳۹۵وږی ۲۵) الماس خدرخېل
تېره شپه د کندوز ولايت چاردرې ولسوالۍ اړوند سرک بالا د زاخېلو په سيمه کې امريکايي او افغان کمانډو ځواکونو د عامو اولسي خلکو په کورونو د تالاشۍ په موخه چاپه کړې.
ځايي اوسېدونکي وايي، چې د چاپې پر مهال امريکايي او کمانډو ځواکونو د خلکو کورونه تالاشي کړي او ډيری خلک يې وهلي ډبولي هم دي، دوی وايي چې ورغلو عسکرو ورته ډېری مالي تاوانونه رسولي او د کورونو شتمنۍ يې لوټلي دي.
بل پلو طالبانو په يو خبر کې ويلي، چې په ياده سيمه کې يې د چاپې پر مهال په ګډو ځواکونو د ماينونو چاودنې کړي او د ۳ تنو امريکايي عسکرو په ګډون يې ۲ تنه افغان کمانډو عسکر هم وژلي او ۵ تنه نور يې ټپيان کړي دي.
دوی زياتوي، چې د وژل شوو عسکرو د جسدونو اندامونه يې په شاوخوا سيمه کې پراته دي.
طالبانو په يو بل خبر کې ويلي دي، چې د همدې ولايت په دشت ارچي ولسوالۍ ملاقلي سيمه کې هم ګډو ځواکونو چاپه کړې، چې پر مهال يې د دوی وسلوالو په ګډو ځواکونو د ماين چاودنې کړي، چې پکې د مشهور قومندان تورن نقيب د وژلو تر څنګ د يو شمېر ګډو ځواکونو ته د مرګ ژوبلې وراړولو دعوه کوي.
د ځايي اوسېدونکو په وينا، چې د امريکايي او افغان ځواکونو په دې شپنۍ چاپو کې يې ۱۱ تنه کليوال له ځان سره وړي دي.
