(کابل ټکی کام ۱۳۹۵ تله ۴) زرغون خوږیاڼی
د افغانستان دمالیې وزیر اکلیل حکیمي تېره ورځ په افغانستان کې د آسیا دپراختیایي بانک له رئیس تام پنیلا سره د سالنګ دهلیز دسړک د بیارغاونې، مؤثریت او په هیواد کې د ننه او مرکزي آسیا د توکو او خلکو د مصؤنیت له پاره د ۳۱.۳۷ میلیونه امریکایي ډالرو وړیا مرستې تړون لاسلیک کړ.
د یادې مرستې ۱۵٫۹۲ میلیونه ډالر د جاپان مرسته ده چې د افغانستان بنسټیزو پروژو وجهي صندوق لارې ورکول کیږي. دغه صندوق په ۲۰۱۰ میلادي کال کې جوړ شوی او د مرستندويانو له خوا تمويليږي. ددې صندوق موخه د زیربنایي پروژو د جوړیدو له لارې د خلکو په ژوند کې د ښه والي راوستل دي.
د افغانستان د مالیې وزارت وايي، اسیايي پراختیايي بانک د سالنګ تونل د سړک د بیارغونې لپاره افغانستان سره ۳۱ ملیون ډالره مرسته وکړه.
د مرستو د اعلان پر مهال د افغانستان د مالیې وزیر اکلیل حکیمي وویل، د اسیايي پراختیايي بانک په دې مرستو به په نړیوالو معیارونو برابر د سالنګ تونل بیا ورغول شي، حکیمې زیاته کړه، چې ددې تونل په معیاري توګه جوړېدل د منځنۍ اسیا او جنوبي اسیا د پُل په توګه د افغانستان له رول سره مرسته کوي او دغه راز د سیمې په سوداګرۍ او اقتصادي وده کې مثبت اغېز لري.
د یادونې وړ ده، چې اسیايي پراختیايی بانک تر دې مخکې هم له افغانستان سره ۲ ملیارده او ۲۰۰ ملیون ډالره مرسته کړې چې سړکونه، پلونه، د اورګاډي پټلۍ او نورې پروژې پرې جوړې شوي دي
