( کابل ټکی کام ۱۳۹۵ تله ۸) زرغون خوږیاڼی
نن په کابل کې د افغان ولسمشر اشرف غني او د حزب اسلامي مشر ګلبدین حکمتیار ترمنځ د سولې هوکړه لیک لاسلیک شو.
لومړی حکمتیار له وړاندې څخه د ثبت شوې وېډیو له لارې خپله وینا غونډې ته واوروله او وروسته یې د سولې تفاهم لیک لاسلیک کړ.
په ارګ کې د سولې هوکړه لیک د لاسلیکېدو لپاره د ارګ غونډې ته پخوانی ولسمشر حامد کرزی، سیاف، ډاکټر عبدالله او نور ګڼ شمیر افغان سیاستوال، دولتي چارواکي او بهرني ډيپلوماټان ورغلي وو.
ویل کیږي چې حکمتیار دا خبرې له وړاندې ثبت کړې وې او د غونډې ګډون کوونکو ته یې واوروله، له خبرو وروسته حکمتیار د وېډیو له لارې له د سولې هوکړه لاسلیک کړه.
حکمتیار په خپله وینا کې وویل، په هیواد کې د بهرنیو لاسوهنو له لارې جګړه اوږده شوه او بهرني یرغل ته یې لاره هواره کړه.
حکمتیار په خبرو کې وویل، طالبانو او نور مخالفین دې په دې مذاکراتو کې په زړورتیا او جرئت سره برخه واخلي، خپلې ټولې شرعي غوښتنې دې وړاندې کړي.
ده زیاته کړه، که د سولې او سولې خبرو نتیجه ورنکړه نو هیڅو ک مونږ له جهاد او وسله وال مقاومت څخه نشي منعه کولی.
حکمتیار وویل، زه د اشرف غني څخه غواړم چې د سولې په اړه د مقابل لوري وړاندې خپل اخلاص او نیک نیت ثابت کړي، د طالبانوسره مذاکرات پیل کړي، د طالبانو مهم بندیان له هر راز قید او شرط پرته ازاد شي.
ده په خپلو خبرو کې وویل، هغوی ته چې د سولې مخالفت کوي او د جنګ په دوام ټينګار کوي وایو: افغانان نور د داسې جنګ شعارونه نه بدرګه کوي چې یواڅې افغانان په کې ووژل شي، که په جنګ کې ۱۰۰۰ وګړي مري نو ۹۹۹ یې افغانان دي.
حکمتیار زیاته کړه دې جنګ په ۱۵ کلونو کې هیڅ کومه مثبت نتیجه نه ده ورکړې.
ویل کیږي چې حکمتیار به د امریکایانو له تور لیست څخه له ویستلو وروسته کابل ته راشي.
افغان ولسمشر محمد اشرف غني د حکمتیار له وینا او د سولې تفاهم لیک له لاسلیکولو وروسته هم د سولې په تفاهم لیک لاسلیک وکړ، اشرف غني وویل، نن موږ د حزب اسلامي له مشر ښاغلی ګلبدین حکمتیارسره د سولې د تړون لاسلیک غونډه کې راټول شوي یو. زما او د حکمتیار مشترکه دنده دا ده چې جګړه بس شي او افغانستان له جګړې راویستل شي
