هندي پولیسو هغه کوتره نیولې چې مودي ته یې د پاکستان ګواښ لیږدولو
(کابل ټکی کام ۱۳۹۵ تله ۱۳) زرغون خوږیاڼی
د هند د پنجاب په ايالت كې سرحدي پوليسو يوه كوتره نيولې ده، چې په پښه پورې يې د لشكر طيبې وسله والې ډلې هغه پيغام ګنډه شوى و، چې په كې نرېندرا مودي د مرګ ګواښ شوى و.
هندي رسنيو ویلي دي، چې دا كوتره پاكستان سره پولي ته نږدې د ناروت جايمال سينګ د امنيتي پوستې په ساحه كې نيول شوې ده.
د فرانس پریس خبري اژانس د خبر له مخې، د پټانکوټ د پولیسو رييس رامیش کومار وویل، د كوترې په پښې پورې يو پيغام ګنډه شوى و، چې په اوردو ژبه په كې مودي ته په خطاب كې ليكل شوي دي چې “ موږ د ۱۹۷۱م كال پر مهال له خلکو سره مه پرتله كوه، زمونږ هر ماشوم د هندوستان سره جګړې ته تيار دى”.
کومار وايي، چې د لیک په وروستۍ کرښه کې د لشکر طیبې نوم لیکل شوی دی، چې نریندرا مودي ته یې د مرګ ګواښ هم کړی، دده په وینا د پيښې په اړه پلټنې روانې دي.
لشکر طیبې د ۱۹۷۱ م کال هغه پيښې ته اشاره کړې ده چې د پاکستان یولک سرتېري په بنګله دېش کې هندي پوځیانو ته تسلیم شول او بنګله دېش یو خپلواک هېواد شو.
