دوستم د کندوز د جګړې قومنده په غاړه واخیسته
(کابل ټکی کام ۱۳۹۵ تله ۱۳) زرغون خوږیاڼی
تیره ورځ طالبانو د کندوز ولایت مرکزي ښار تر بریدونو لاندې راوست او په لومړیو کې د ښار څو برخې تر خپل تسلط لاندې راوستلې.
طالبانو صحنه په صحنه ویډيو فلمونه نشر کول، چې د کندوز ښار مرکزي چوک یې هم لاسته راوړی و.
وروسته له هغه چې دولتي ځواکونه ونه توانیدل د طالبانو د بریدونو مخه ونیسي، د ولسمشر لومړي مرستیال رشید دوستم د کندوز د جګړې مشري په غاړه واخیسته.
د کورونیو چارو وزارت ویلي دي، چې دوستم له کابل نه د کومانډویي ځواکونو سره کندوز ته رسیدلی او هلته به د دولتي ځواکونو هماهنګي او د جګړې مشري په غاړه واخلي.
د ولسمشر غني لومړي مرستیال بیا ازادۍ راډیو ته ویلي، چې ځواکونه یې د پر مختګ په حال کې دي، دده په وینا چې په ښار کې به
تصفیوي عملیات پيل شي.
د یادونې وړ ده چې تیر کال هم وسله والو طالبانو د کندوز ولایت نیولی و، چې وروسته یې د جګړې قومنده جنرال رازق په غاړه واخیسته.
طالبانو نن سهار ويلي،چې جګړې یو ځل بیا زور اخیستی او دوی لا هم د پرمختګ په حال کې دي، د طالبانو په وینا ددوی ځواکونه د ولایت ودانۍ او میدان هوايي طرفته پرمختګ کوي.
