کابل ټکی کام ۱۶تله/۱۳۹۵، سمسور ګیلاني
د پاکستان د لومړي وزیر ځانګړی استازی مشاهد حسین او د ملي اسمبلۍ یو بل غړی شزرا منصب دواړه امریکا ته په دې موخه تللي دي، تر څو د کشمیر د مسلې په اړه هلته له امریکایي چارواکو سره لیده کاته وکړي.
ویل کیږي، چې دواړه استازي به پر امریکا ډیپلوماتیک فشار واچوي.
د پاکستان د لومړي وزیر ځانګړي استازي مشاهد حسین سید د پنجشنبې په ورځ په واشنګټن کې د امریکا اتلانتیک کونسل په نوم د یوه فکري مرکز غونډه کې د خپلې وینا پر مهال وویل، چې امریکا اوس نړیوال ځواک نه دی، قدرت یې د کمېدو په حال کې دی، نور یې مه یادوئ او هېره یې کړئ!
نوموړي خبرداری ورکړ:
«که امریکا د کشمیر په مسله کې د اسلام اباد خبرو ته غوږ ونه نیسي، نو روسیې او چین ته به ورغږ کړي.»
نوموړي همدا راز وویل، چې د اوباما په مشرۍ امریکایي حکومت دې په دې ځان پوه کړي، چې د اسلام اباد له مرستې پرته په افغانستان کې سوله نا ممکنه ده.
«که د کشمیر مسله هواره کړی شي، نو په افغانستان کې به هم د سولې څرک ولګیږي او دوی له امریکا څخه په جدي توګه غوښتنه کوي، چې په کشمیر کې د انساني حقوقو د خلاف ورزۍ په برخه کې منځګړیتوب وکړي.»
د یادولو ده، امریکا ته د پاکستان دواړه استازي داسې مهال تللي دي، چې په دې وروستیو کې د هند او پاکستان د سرحدي پولې ترمنځ پر یو بل بریدونه وشول.
