(کابل ټکی کام ۱۳۹۵ تله ۱۶) زرغون خوږیاڼی
روسیه: که امریکايي الوتکې په سوریه کې د اسد په پوځ حمله وکړي، روسیه به یې راوپرځوي.
د روسیې د دفاع وزارت ویاند جنرال ایگور کوناشینکوف خبرداری ورکړی، که د امریکې ائيتلاف هوايي قواوې په سوریه کې د اسد په رژیم حمله وکړي، د روسیې دفاعي سیستم به یې راوپرځوي.
تېره اوونۍ روسیې په سوریه کې اس ۳۰۰ او اس ۴۰۰ د هوا ضد میزایلو دفاعي سیستمونه نصب کړل او همدارنګه یې ۳ لویې جنګي بیړۍ د مدیتراني بحیرې ته لیږلي دي.
ویل کیږي چې د روسیې لخوا امریکا ته دا تر ټولو خطرناک او روښانه خبرداری دی، چې د سوریې په پلوۍ دوی دواړه یو بل ته ګوته نیونه کوي.
تیره اوونۍ امریکا په روسیې تور پورې کړ، چې په حلب ښار کې یې په عام وژنو لاس پورې کړی او یو لوی ناورین یې رامنځته کړی، روسیي الوتکو په بمباریو کې په سلګونو عام وګړي ووژل شول او هم یې په حلب کې یو روغتون بمبار کړ چې په کې د ښځو او ماشومانو په ګډون د روغتون ډاکټران هم ووژل شول.
مسکو او واشنګټن تیره میاشت په سوریې کې د تاوتریخوالو د کمولو، د بشري مرستو د رسولو او د ترهګرو ډلو د ځپلو په موخه پر یوه اوربند موافقه وکړه. خو دغه معامله ډیر ژر وشلیدله داسې چې دواړه غاړې د پړې ګوته یو بل ته نیولې.
د متحدو ایالتونو د بهرنیو چارو وزارت ویانده الیزابت تروډو ویلي و، چې “تاسې پوهیږئ چې روسیې سره په خبرو کې زموږ موقف ډیر روښانه و هغه دا چې بشري مرستو ته لاسرسی ممکن شي او شخړې پاې ته ورسیږي. بلاخره پوه شوو چې د روسیې سره مشترک هدف ته نه رسیږو.
کوناشینکوف زیاته کړه، زه غواړم د امریکا د ستراتیژۍ جوړوونکو ته یو خبر ورکړم، چې سوریه اوس د روسیې دفاعي اس ۳۰۰ او اس ۴۰۰ د هوا ضد میزایلو سیستمونو باندې پوښل شوې ده، د ټولو الوتکو لپاره چې په سیمه کې الوتنه کوي شاید دا تر اټکل ډیر حیران کوونکې وي.
یاد جنرال وویل، مونږ امریکا ته یادونه کوو چې ددې پلان په اړه دې ژور فکر وکړي.
