کابل ټکی کام ۱۸تله/۱۳۹۵، احمدالله مهاجر
له فراه ولایت څخه خبري سرچینې خبر ورکوي، چې د دغه ولایت د مرکز اړوند سیمو کې طالبانو درنده جګړه روانه کړې ده او پر یو شمېر مرکزي سیمو یې هم واک ترلاسه کړی دی.
خبر وایي، طالبانو دا مهال د مرکز اړوند نوبهار او بېرنګ توت سیمې نیولي دي او دا مهال یې په مرکز پورې مربوطې (باغ پل) سیمه کې یې درنده جګړه پیل کړې ده.
نوبهار سیمه د فراه ښار شمال لویديځ ته شاوخوا ۱۲ کیلو متره لرې پرته ده او باغ پل سیمه د ښار لویدیځ ته په دوه کیلو مترۍ کې واقع ده.
د فراه د والي ویاند ناصر مهري هم د مرکز اړوند سیمو کې د طالبانو د پرمختګ خبر ورکړی دی او ویلي یې دي، چې دولتي ځواکونه هڅه کوي، تر څو سقوط شوې سیمې بېرته خپلې کړي.
نوموړي تأیید کړه، چې دا مهال جګړه په باغ پل سیمه کې په شدت سره روانه ده.
د فراه ولایت د ځوانانو شورا مشر محمد داوود وویل:
«وسله والو طالبانو د مرکز اړوند پرمختګ کړی دی او په باغ پل سیمه کې له دولتي ځواکونو سره یې درنده جګړه پیل کړې ده.»
د یادولو ده، طالبانو په هلمند، کندوز او بغلان ولایتونو کې هم درندې جګړې روانې کړي دي، چې یو شمېر پراخې سیمې یې هم نیولي دي.
