پکتيا: زرمت کې کمانډو ځواکونو د يوې ليسې په زده کوونکو تشدد کړی
(کابل ټکی کام ۱۳۹۵تله ۲۷) الماس خدرخېل
د پکتيا ولايت د زرمت ولسوالۍ اړوند د ځانګړو ځواکونو یو تن قوماندان، چې سیدعارف نومیږي، د باتور عالي لیسې یو تن زده کوونکی لمړی د ټولګي څخه را ایستلی او وروسته يې د یاد زده کوونکي څخه جامې ویستلي دي.
د نوموړې ليسې شاګرد نصرت الله وايي، چې بربنډ انځورونه یې ترې اخیستل او سيد عارف به خلکو ته ویل، چې دا زده کوونکی د طالبانو سره لاس لري.
پېښه تېره ورځ په باتور ليسه کې رامنځته شوې، او نوموړي قومندان د ليسې يو زده کوونکی په ډزو ژوبل کړی، چې د شديد ټپ له کبله يې کابل ته د تداوۍ په موخه لېږدولی دی.
ځايي خلک وايي، کله چې د ليسې ښوونکو د قومندان مخه نيوله نو يو ښوونکی يې سخت ژوبل کړ، وروسته د ليسې شاګردانو د ښوونکي د شکنجه کولو د مخنيوي هڅه وکړه، چې قومندان عارف د ليسې په شاګردانو ډزې وکړې او ټپيان يې کړل.
شاګردانو ليسه تړلې او د يادې پيښې د پلټنې او قومندان ته د سزا ورکولو غوښتنه کوي.
د زرمت ځوانانو ټولنې له حکومت څخه غوښتنه کړې، ترڅو په دې برخه کې عدالت پلی شي او نوموړی قومندان ته سخته جزا ورکړل شي.
دوی زياتوي، چې ياد قومندان د اسلامي او افغاني اصول او عنعناتو په ضد کار کړی ده او په هیڅ وجه د بخښلو وړ نه دی.
د زرمت د ځوانانو ټولنې رسنيو ته ويلي: مونږ له حکومت څخه غواړو چې نوموړی له دندې ګوښه او د قانون مطابق ورته جزا ورکړي، که چیرې نوموړي ته د حکومت لخوا جزا ورنکړل شي، نو بیا به د زرمت ولسوالۍ خلک یاد قوماندان ته په خپله سزا ورکړي.
