د موصل په روانو عملیاتو کې یو امریکایي عسکر وژل شوی
کابل ټکی کام ۳۰تله/۱۳۹۵، سمسور ګیلاني
نن څلورمه ورځ ده، چې د عراق په موصل ولایت کې د امریکايي ائتلاف په مرسته عراقي ځواکونو د داعش څخه د دغه ښار د بېرته نیولو په موخه پراخ عملیات روان کړي دي، چې د امریکا د دفاع وزارت په وینا، داعش شاتګ کړی او د عراقي ځواکونو پرمختګونه د پام وړ دي.
دا مهال د امریکا پوځ ویلي دي، چې د عراق په شمال کې د دوی یو امریکایي سرتېری وژل شوی دی.
د امریکایي پوځ په خبرپاڼه کې راغلي دي، چې دغه امریکايي عسکر د سړک د غاړې په ماین چاودنه کې لومړی ټپي او بیا یې وروسته ساه ورکړه.
د موصل د بېرته نیولو عملیاتو کې شاوخوا ۲۵ زره قوه برخه لري، چې د عراقي پوځیانو سربېره پکې کُردي ځواکونه، سني قبایلي ملېشې او شیعه ملېشې شاملې دي.
د موصل د بېرته نیولو په جګړه کې د امریکا د ځانګړو عملیاتو شاوخوا سل عسکر برخه لري او شاوخوا پنځه زره نور امریکایي عسکر په نظامي اډو کې اوسیږي، چې له همدې اډو څخه د موصل د عملیاتو کې همکاري کوي.
د عراق لومړي وزیر حیدرالعبادي ویلي دي، چې د دوی ځواکونو په موصل کې پرمختګ کړی دی او چا ته به اجازه ور نه کړي، چې په موصل کې پر بشري حقونو تېری وکړي.
