کابل ټکی کام ۲۲میزان/۱۳۹۴
احمدالله مهاجر
د کابل کندهار پر لویه لار د طالب جنګیالیو له لورې تم شویو د ملکي وګړو سلګونو موټرو ته له درې ورځو څخه وروسته د تګ اجازه ورکړل شوه.
ځايي خلک وايي چې طالب د دې لپاره د کابل کندهار لویه لاره تړلې وه، چې تر څو عام خلک په جګړه کې متضرر نشي، چې نن د طالبانو له لورې ورته اجازه ورکړل شوه.
د طالبانو ویاند ښاغلی ذبیح الله مجاهد رسنیو ته ویلي دي چې په دغه لاره د تګ اجازه له ملکي وګړو سره د خواخوږی اظهار دی.
مجاهد زیاته کړې ده چې د غزني ولایت په مرکز، شلګر ولسوالۍ، آب بند، قره باغ او جغتو ولسوالیو کې په افغان عسکرو د بریدونو او درنو چاودنو له کبله ۱۳ټانګونه، تر ۴۰ پورې عسکر او پولیس له منځه تللي دي، او ګڼ شمېر نور ټپيان دي.
دی وایي چې د افغان عسکرو د هوان د بریدونو له کبله په نوغه کلي کې ۴تنه هېوادوال وژل شوي دي او ۷تنه ښځو او ماشومانو ته ژوبله اوښتې ده.
د مجاهد د خبر لمخې چې د دوی ۱تن جنګیالی له منځه تللی دی او ۶تنه نور ټپيان دي.
د مجاهد په وینا چې د افغان عسکرو پوستې، قرارګاوې، د غزني او زابل ولایتونو مرکزونه د دوی د جنګیالیو تر بریدونو لاندې دي، او شېبه په شېبه د محاصرې کړۍ پرې تنګیږي.
او وايي چې افغان عسکر د تلفاتو په لیدو سره د امریکایي ځواکونو څخه د مرستې غوښتنې ته اړ شوي دي، او ګڼ شمېر دولتي کسان له دغو ولایتونو څخه ښپې سپکې کړي دي او د کابل په لور تښتېدلي دي.
