لیکوال : م، نجم الرحمن (فضلي)
د لمانځه د څلورم شرط بيان
يعنې د لمانځه کولو په وخت کې د بدن د هغې برخې پټول فرض دي د کومې ښکاره کول چې شرع حرام دي، خواه که يوازې (تنها) لمونځ کوي او که چا پر وړاندې يې کوي.
که چيرته کوم کس تنها په مکان کې لمونځ کوي يا يې په تياره ځاى کې کوي نو په هغه باندې هم د عورت پټول فرض دي (يعنې د هغې برخې د کومې ښکاره کول چې بل چا ته حرام دي) اګر که د بل کس د ليدلو ويره او امکان نه وي، هو ! له خپل نظر څخه پټول شرط نه دي، که چيرته د کوم کس نظر په خپل عورت باندې د لمانځه کولو په وخت کې ولويژي نو هيڅ خبره نشته ([1]).
د عورت پټولو مطلب
پوښتنه : د عورت پټولو مطلب څه دی؟
ځواب : د نارينه عورت له نامه څخه تر زنګنو پورې دی، چې پټول يې په لمانځه کې ستر دي او له لمانځه څخه د باندې يې پټول فرض دي، که يې په لمانځه کې د يوه اندام څلورمه برخه ښکاره شوه نو لمونځ يې نه کيږي، د زنانه ؤ ټول بدن له لاس، پښې او مخ څخه پرته ټول ستر دي، فرق دا دی چې زنانه ؤ ته په لمانځه کې د مخ پټول فرض نه دي او له لمانځه څخه د باندې يې ښکاره کول نه دي روا ([2]).
په نفل لمانځه کې د دريدلو حکم
پوښتنه : په نفل لمانځه کې د دريدلو حکم څه دی؟
ځواب : په نفل لمانځه کې دريدل فرض نه دي، خو بې له کوم عذره په ناسته لمونځ کول نيم ثواب لري ([3]).
په تنهائي کې لوڅ لغړ لمونځ کول
پوښتنه : وخت دومره تنګ دى چې فرض اداء کيدلاى شي، په داسې صورت کې د جامه پاکول ضروري دي، که چيرته د ځانتوالي ځاى پيدا شو نو لوڅ لغړ لمونځ کيدلاى شي او که نه؟ او که چيرته د ځانتوالي ځاى پيدا نشو نو په هماغو جامو کې لمونځ کيدلاى شي او که نه؟.
ځواب : د وخت د تنګي له امله په ناپاکو جامو کې لمونځ کول صحي نه دي، د هغو پاکول ضروري دي، او په ځانتوالي کې لوځ لغړ لمونځ کول روا نه دي ([4]).
([1]) مسايل رفعت قاسمي، ٢ : ٣٢، بحواله : البحرالرائق، درمختار، مراقي الفلاح، علم الفقه، ج : ٢، ص : ٢٦، هدايه، ج : ١، ص : ٥٨، کبيري، ص : ٢٠٨.
([2]) تعليم الاسلام، دريمه برخه.
([3]) تعليم الاسلام، دريمه برخه : ٥٩.
([4]) فتاوى محموديه، ٥ : ٥٢٠، بحواله : ردالمختار، کتاب الصلوة، باب شروط الصلوة، ج : ١، ص : ٤٤٠، وکذا في الفتاوى عالمګيرية، کتاب الصلوة، الفصل الثالث في شروط الصلوة، ج : ١، ص : ٥٨.
