له پاکستانه د افغان کډوالو د ستنېدو بهير د ژمي په راتلو ځنډېدلی
(کابل ټکی کام ۱۳۹۵لړم ۱۱) الماس خدرخېل
د ملګرو ملتونو د کډوالو نړيوالې ادارې په يوه خبرپاڼه کې ويلي، چې له پاکستان څخه يې د افغان کډوالو بهير د ژمي له امله درې مياشتې ځنډولی دی.
د ادارې په خبرپاڼه کې ويل شوي، هغه خلکو چې تر دې مهاله يې نمبر اخيستې هغه به په ټاکلې نيټه ځي.
دوی زياتوي، چې دا لړۍ د نومبر مياشتې تر پايه روانه وي او نورو کډوالو ته به د بېرته ستنېدلو نمبر يا وخت نه ورکوي.
د ورکړل شوي، خبر له مخې له پاکستانه د افغان کډوالو د بېرته ستنېدو لړۍ به د ۲۰۱۷م کال د مارچ پر لومړۍ نېټه بيا پيل کېږي.
بايد وويل شي، چې په دې درې مياشتو کې به په پاکستان کې د بيرته ستنېدنې دفترونه تړل شوي وي او په کندهار کې د مرستې د ورکړې دفتر به د نومبرله ٢١ څخه د٢٠١٧ د مارچ ترلومړۍ او د کابل او جلال اباد دفتر به د دسمبرله ١٥ مې څخه ٢٠١٧ کال د مارچ تر لومړۍ پورې تړلى وي.
د دې ادارې په خبرپاڼه کې ويل شوي، چې په دې مهال کې به کارت لرونکي افغان کډوال به په دغه هېوادکې له ټولو قانوني حقونو څخه برخمن وي.
