فاریاب قیصار ولسوالۍ کې یو تن پولیس له ګڼ شمېر مهماتو سره طالب جنګیالیو ته تسلیم شو

کابل ټکی کام ۲۳میزان/۱۳۹۴
احمدالله مهاجر
د طالبانو ویاند ښاغلی ذبیح الله مجاهد زمونږ همکار ته ویلي دي چې نن سهار د فاریاب ولایت د قیصار ولسوالۍ مرکز میمنې یوه اوسېدونکي پولیس «فقیرمحمد ولد محمد امان» د قیصار په ولسوالۍ کې مېشتو طالب جنګیالیو سره یو ځای شو.
او یاد پولیس فقیر محمد له ځانه سره یو ټانګ، یوه دهشکه، یو ثقیل، یو کلاشنکوف، یو بم افګن یوه مخابره او ګڼ شمېر نور مهمات د دوی تر جنګیالیو پورې راوړي دي.
د یادونې وړ ده چې ذبیح الله مجاهد دعوه لري دا د دوی د جلب او جذب د کمیسون د هلو ځلو پایله ده.
د هېواد په یو شمېر ولایتونو کې افغان عسکر یا د تنخوا د نه ورکولو له کبله او د طالب جنګیالیو په جګړه کې د تلفاتو څخه د ځان ساتنې په موخه او یا هم د طالب وسلوالو د جلب او جذب د کمیسون د هلوځلو له کبله له افغان عسکرو څخه ګڼ شمېر مهمات طالب جنګیالیو ته سپاري، او ځان ورته تسلیموي، چې دا د افغان عسکرو په کمزورۍ لوی دلیل دی.