کابل ټکی کام ۲۴میزان/۱۳۹۴
قدرت الله حسین
روستي الوتکو په سوريه کې نن او پرونو په خپلو بريدونو کې له اتيا ډېر ولسي وګړي وژلي او لسګونه نور يې ټپيان کړي دي.
د سوريې سيمه ييزې رسنۍ راپور ورکوي، چې په وژل شويو کې بشپړې کورنۍ هم له منځه تللې دي او د بمبار ډېری قربانيان مېرمنې او کوچنيان دي.
روسي الوتکو نن په حلب او حمص ښارونو کې نږدې ۴۰ هوايي بريدونه کړي دي.
اناضول خبري اژانس ليکلي دی، چې روسيې په دغو بمباريو کې ډېرې پر کليو او ښارګوټو کړې دي، چې ولسي خلک يې قربانيان دي.
بل لور ته الجزيرې ليکلي دي، چې د سوريې د دولت وسله والو مخالفينو په حلب کې د سختو جګړو په ترڅ کې درې دولتي ټانکونه الوزولي دي او ۱۵ دولتي عسکر هغه مهال د مخالفينو له لوري ونيول شول، چې د حلب د جبل عزان او الوضيحي کلي پر لور د پرمختګ په حال کې وو.
روسي ځواکونو تېره ورځ هم په حلب کې پر دوه روغتونو بمونه ورولي و، چې د ډاکټرانو په ګډون ګڼ شمې ولسي خلک په کې ووژل شول او ياد روغتونونه وتړل شول.
همدا راز په حمص کې پر څو کليو او ښارونو د روسيې د تېرې ورځ په بمبار کې لږ تر لږه ۷۵ تنه ووژل شول، چې ډېر يې کوچنيان او مېرمنې وې.
ياده دې وي، چې له روسي الوتکو سره د سوريې دولتي الوتکو هم د سوريې پر ولس درنده بمباري جاري ساتلې ده، چې د سيمې د خلکو په وينا د ولسي وګړو د تلفاتو کچه د پخوا په پرتله څو چنده شوې ده، دولتي الوتکې هلته پرته له توپيره بمونه غورځوي او نږدې هره ورځ لسګونه ولسي کسان وژني.
