فراه کې تښتول شوی ماشوم د اختطافګرو له منګولو وژغورل شو
(کابل ټکی کام ۱۳۹۵لړم ۲۵) احمدالله مهاجر
د ملي امنیت کارکوونکو د فراه هغه ماشوم چې له یوې میاشتې راهیسې د سړي تښتونکو له خوا تښتول شوی وو، ژغورلی او خپلې کورنۍ ته یې سپارلی دی.
د ملي امنیت ادارې له خوا په خپره شوې خبرپاڼه کې راغلي دي، چې نوید احمد یې د تښتوونکو له منګولو ژغورلی او د تښتوونکو دغه څلور کسیزه ډله یې هم نیولې ده.
خبرپاڼې ویلي دي، چې ماشوم یې روغ رمټ خپلې کورنۍ ته سپارلی دی.
د سړي تښتوونکو له خوا د نوید احمد هغه ویډیو چې کورنۍ ته یې لېږلې وه، په خواله رسنیو کې په پراخه توګه خپره شوه او له کبله یې د ملي امنیت ځواکونه په بې غورۍ او ناغېړۍ تورن شول.
د فراه ولایت والي آصف ننګ ویلي دي، چې دوی ډېر قوي کشفي هڅې پیل کړې، تر څو نوید احمد هم روغ لاسته ورشي او د تښتوونکو دغه ډله هم ونیسي.
ننګ زیاته کړې ده، چې امنیتي ځواکونو د خپلو هڅو په پایله کې نن مازدیګر نوید احمد ته لاسرسۍ وموند او د سړي تښتوونکو ډله یې هم ونیوله.
د نوید احمد کورنۍ وايي، چې سړي تښتوونکو له دوی څخه د لسګونو زرو امریکایي ډالرو غوښتنه کړې وه، مګر د دوی له خوا څخه ځکه مثبت ځواب نه ورکول کېده، تر څو په فراه کې سړي تښتول دود نه شي.
