(کابل ټکی کام ۱۳۹۵ لیندۍ ۳) زرغون خوږیاڼی
د مصر حکومت د لیبیا له وسله وال پوځ څخه ملاتړ اعلان کړی دی.
د مصر ولسمشر په ټینګار سره ویلي دي، چې قاهره د لیبیا له ملي پوځ نه ملاتړ اعلانوي، ځکه چې د لیبیا اردو کولی شي په سیمه کې د ترهګرو پر وړاندې مقابله وکړي، نوموړي زیاته کړې چې د لیبیا په وسله وال پوځ د وسلو په برخه کې لګیدلي بندیزونه باید لغوه شي.
د مصر جمهور رئیس عبدالفتاح السیسي په یوه وینا کې څرګنده کړې ده، چې حکومتونو نسکورول په ملتونو کې د افراطي ډلو د پیدا کیدو سبب ګرځي.
ځايي خبرې سرچینې الیوم السابع ويلي، چې عبد الفتاح السیسي د لیبیا د ملي اردو څخه د ملاتړ په تاکید وویل، نه یواځې دا چې د داعش په وړاندې مبارزه وکړو بلکې له ټولو افراطي ډلو سره باید په مبارزه لاس پورې کړو.
د نوموړي په وینا اوسمهال د لیبیا وضعیت پیچلی دی او په دې برخه کې د قاهرې دریځ روښانه دی، زموږ دریځ دی څو د لیبیا خلکو او پارلمان ته چې اوس یې کاري موده پای ته رسیدلې ده، درناوی وکړو.
د مصر ولسمشر دا هم وويل: که چيري په لیبیا کې افراطي ډلو ته د وسلو د راتګ مخه ونه نيسو، د ګاونډي هیوادونو او اروپا لپاره به خورا ستونزمن شرایط وزیږوي.
السیسي وویل، مونږ د لیبیا سره ۱۲۰ کیلومتره ګډه پوله لرو، که چیرې د لیبیا اردو نه وي هم په دې برخه کې د امنیت د ټینګولو مسئولیت زموږ په غاړه دی، که چیرې نړیواله ټولنه په لیبیا کې د بیدیل حکومت په فکر کې وي دا به د هیچا په ګټه نه وي.
د یادونې وړ ده، چې په لیبیا کې د قذافي له پرځولو وروسته دغه هېواد د جګړو په ډګر بدل شوی دی او یوه لویه حکومتي خلا رامنځته شوې ده، چې تر ډيره هر قوم په خپله سیمه خپل تسلط لري، یو ددوی نه د پخواني ولسمشر قذافي خپل قوم دی چې تر ډیره پکې حکومتي عسکر تر بریدونو لاندې راځي.
