سرلیکنه
د هېواد ولسمشر محمد اشرف غنی وړمه ورځ د لوېې جرګې په تالار ځوانانو ته په وینا کې د ولس سره خپلې کړې ژمنې یو ځل بیا تکرار کړې او ویې ویل، ځوانانوعلم او پوهه ستاسې د روښانه ژوند تضمینوونکی ده اود افغانستان راتلونکی د ستاسو په لاسونو کې دی.
اشرف غني د تیرې اونۍ په هند کې د اسیا زړه کنفرانس ته اشاره وکړه ویې ویل، چې د پاکستان صداعظم نوازشریف سلاکارسرتاج عزیز ته مې وویل موږ ته ۵۰۰ میلیونه ډالر مرسته مه راکوه په خپل هیواد کې دې د ترهګرو به ځپلوکې مصرف کړه .
اشرف غني په خپله وینا کې داهم وویل افغانستان له چاخیرات نه غواړي، د هر چا سره د حکومت په کچه ښې اړیکې غواړو.
که څه هم دهند په اسیا زړه کنفرانس کې د اشرف غني په وینا ورځې واوړیدې؛ خو رسنیو ورته زیات اهمیت ورکړی او هره ورځ ترې یو نوی تعبیر را باسي.
د لوېې جرګې په تالار کې اشرف غني په افغان ځوانانو غږ(ږغ) وکړ چې د نورو ګاونډیو هیوادونو لکه چین، پاکستان، ایران، ترکمنستان او ازبکستان له ځوانانو باید تاسې زیاته پوهه ولرئ.
اشرف غني تراوسه په دې نه دی خبر، چې یوه میاشت مې هم حکومت بې له خیراته نه شي پائیدلی، خپله ډاکټر عبدالله سره په ارګ کې د لیدلو وخت نه لري خو د دوېم کچکول د ډکولو لپاره یې د برکسل غونډی له ځانه سره بیولای و.
اشرف غني په تېر یو کال کې د سولې په نامه د څلور اړخیزو پنځو غونډو په جوړلو څه لاس ته راوړل ؟
تیره اوونۍ یې د ترکمنستان له ولسمشره په عشق آباد کې دڅه غوښتنه وکړه په وړي کچکول کې دې چې څه راوړل هغه خیرات نه دی.
هر میاشت چې دې ملکی او نظامي معاشونه له بهره پوره کیږي داخیرات نه دی؟
د رسمي شمیر له مخې دا مهال په حکومت کې د اختلافاتو له امله ۵۱۰۰۰ چوکۍ خالي پرتې دي، دا مهال هیواد دیارلس نیم میلیونه وګړو ته د کار اړتیا لري؛ خو یواځې نهه میلیونه یې په کار بوخت دي،۴۲ سلنه ځوانان بې کاره ګرځي، ۱۳سلنه ځوانان نورو هیوادونو ته د کار لپاره وتلي دي ،۷۰سلنه افغانان په خپل حکومت او نظام باور نه لري چې پر ناسم لوري روان دی.
له ۲۰۰۴کال راوروسته چې ایشیا فونډیشن هرکال د افغانستان په اړه سروې کوي وايي، زیات شمیر افغانان له خپله حکومته نا هیلي شوي دي.
له بې کاریو ډلې ډلې ځوانان د مخالفو وسله والو سره یوځای کیږي آن د ملي اردوعسکر خپلې دندې پریږدي او طالبانو ته تسلمیږي.
که د افغانانو په رایو دا حکومت جوړ شوی وای، نو امکان یې درلود د ولس غوښنې یو څه پوره شوې وای؛ خو د جان کیري په لاس جوړشوی حکومت به ولسمشر آخر خیرات غوښتو ته اړکړي، اوس خو وایی چې خیرات نه غواړم که په هیواد کې همدا حالت دوام ولري خیرات به وغواړي.
